हामी सबैकाे संसारन्यूज

भदौ ४, काठमाडौं । माधवकुमार नेपाल नेतृत्वको समूहले दर्ता गरेको पार्टीको नाम फेरिने भएको छ । नाम जुधाएर दर्ता गर्न निर्वाचन आयोगले नमानेपछि माधव समूहले नाम फेरेको हो ।

माधव पक्षीय नेतृ निरादेवी जैरुका अनुसार आयोगको सुझाबपछि पार्टीको नामबाट ‘एमाले’ हटाइएको छ । उनका अनुसार अब पार्टीको नाम नेकपा (समाजवादी) मात्रै रहनेछ ।

‘नाम जुध्यो भन्ने आयो’, जैरुले संसार न्यूजलाई भनेकी छिन्, ‘हामीले नाम सच्याएर पठाएका छौं, अब नेकपा (समाजवादी)मात्रै हुन्छ ।’

यसअघि माधव समूहले नेकपा एमाले (समाजवादी) नामबाट दल दर्ताको निवेदन दिएसँगै नेकपा (एमाले)ले पनि आयोगलाई नाम जुधाएर दल दर्ता नगर्न भनेको थियो । एमालेका नेताहरु आयोगमै पुगेर नाम, झण्डा र चुनाव चिन्ह जुधाएर दल दर्ता नगर्न भनेका थिए ।

राजनीतिक दलसम्बन्धी ऐनको दफा ६( १) (ङ) र ९ अनुसार पनि राजनीतिक दलको नाम, झण्डा र चुनाव चिन्ह फरक–फरक हुनुपर्ने व्यवस्था छ ।