हामी सबैकाे संसारन्यूज

भदौ ४, काठमाडौं । अष्टलक्ष्मी शाक्य मुख्यमन्त्री बन्नुभन्दा अघिल्लो दिनसम्म पनि माधवकुमार नेपाल पक्षका कार्यक्रमहरुमा सहभागि भईरहेका थिइन् । माधव पक्षले एमालेबाट अलग भई नयाँ पार्टी दर्ताको तयारी गर्दैगर्दा बुधबार अनौठो गरि शाक्य एमाले प्रदेश संसदीय दलको नेतामा निर्वाचित हुँदै मुख्यमन्त्री बनेकी थिइन् ।

डोरमणि पौडेलको अप्रत्यासित राजीनामा र अष्टलक्ष्मीको इन्ट्रीप्रति एमाले र समग्र राजनीतिक वृत्तमा ठूलो तरंग देखिएको छ । अष्टलक्ष्मीको इन्ट्रीप्रति विशेषतः ओली पक्षका नेताहरु उत्साहित पनि देखिएका छन् । ओली पक्षीय नेताहरुले उनलाई शुभकामना र बधाई पनि दिएका थिए ।

तर, ओली पक्षले शुभकामना र बधाई दिए पनि शाक्य ओलीको योजनामा नभई माधव पक्षकै योजनामा मुख्यमन्त्री बनेको खुलेको छ । माधव पक्षीय नेतृ निरादेवी जैरीका अनुसार माधवसँगकै सल्लाह र छलफलपश्चात नै शाक्य मुख्यमन्त्री बन्न गएकी थिइन् ।

उनले बताएअनुसार शाक्य ओली नेतृत्वको एमालेमा नभई माधव नेतृत्वको पार्टीमा प्रवेशसमेत गर्दैछिन् । ‘ओलीले मात्रै राजनीति जान्नुभएको छैन्, अष्टलक्ष्मी जी हाम्रो योजनामा मुख्यमन्त्री बन्नुभएको हो’, जैरीले भनेकी छिन्, ‘माधव जहाँ हुनुहुन्छ उहाँ पनि त्यहिँ आउनुहुन्छ, रह्यो मुख्यमन्त्री ओली पक्षले सहयोग नगरे पनि उहाँ बन्नुहुन्छ ।’

गठबन्धनसँगको छलफलपछि मुख्यमन्त्री

शाक्य मुख्यमन्त्री बन्ने विषयमा सत्तारुढ गठबन्धनभित्र छलफल भएको बुझिएको छ । माधवले शाक्यलाई मुख्यमन्त्री बनाउने योजना अगाडि सार्दै गर्दा सम्भावित अवस्थाका बारेमा प्रधानमन्त्री शेरबहादुर देउवा र माओवादी अध्यक्ष पुष्पकमल दाहाल ‘प्रचण्ड’सँग छलफल गरेका थिए ।

गठबन्धनभित्र बागमति र प्रदेश १ को विषयमा छलफल भएको थियो । बागमतिमा माधव पक्षलाई सघाउने गठबन्धनको निर्णय थियो ।

यस्तो छ बागमतिको अंकगणित

११० सदस्यीय प्रदेशसभामा हाल नेकपा (एमाले)सँग एकल बहुमत अर्थात् ५६ सांसद छन् । जसमध्ये माधव पक्षसँग पछिल्लो अवस्थासम्म २२ सांसद खुल्दै आएका थिए ।

यदि ओली पक्षले साथ नदिए अष्टलक्ष्मी तत्कालै अल्पमतमा पर्छिन् तर, केन्द्रको सत्ता साझेदार कांग्रेस र माओवादी मात्रैले सघाए पनि उनको पक्षमा स्पष्ट बहुमत हुनेछ ।

हाल बागमतिमा माओवादी केन्द्रसँग २३ र नेपाली कांग्रेससँग २२ सांसद छन् । यदि दुवै दलको समर्थन पाएमा अष्टलक्ष्मीको पक्षमा ६७ सांसदको मत हुनेछ ।