हामी सबैकाे संसारन्यूज

९ भदौ, काठमाडौं । नेकपा एमालेबाट विद्रोह गरी अलग भएका माधव नेपालसहितका नेताहरुले गठन गरेको नेकपा (एकीकृत समाजवादी) र महन्थ ठाकुर नेतृत्वको लोकतान्त्रिक समाजवादी पार्टीलाई औपचारिक मान्यता दिएको छ ।

निर्वाचन आयोगले आजको सनाखतपछि माधव नेपाल नेतृत्वको नेकपा (एकीकृत समाजवादी) दल र महन्थ ठाकुर नेतृत्वको लोकतान्त्रिक समाजवादी पार्टीलाई वैधताको प्रमाणपत्र दिएको हो ।

सरकारले संघीय संसद वा केन्द्रीय समितिको २० प्रतिशत पुर्‍याएर दल विभाजन गर्न पाउने गरी राजनीतिक दलसम्बन्धी अध्यादेश ल्याएकै भोलिपल्ट नयाँ दल दर्ताका लागि निवेदन दर्ता गराएकाा थिए । भाद्र २ गते निवेदन दर्ता गराएका दुवै दललाई निर्वाचन आयोगले हस्ताक्षर सनाखतका लागि आज बोलाएको थियो ।

एमालेका ५८ केन्द्रीय सदस्यले नयाँ दल दर्ताका लागि निवेदन दिएका थिए । उनीहरुमध्ये ५६ जनाले सनाखत गरेका छन् ।

महन्थ ठाकुरको नेतृत्वको लोकतान्त्रिक समाजवादी पार्टी दर्ताका जसापाका १४ सांसद र ३१ जना कार्यकारिणी सदस्यले सनाखत गरेका छन् ।

अब प्रदेश र स्थानीय तहका जनप्रतिनिधिहरुलाई दल रोज्न २१ दिनको समय दिइनेछ ।