Sansar News
२१ भदौ, काठमाडौं । देशैभरी रहेको मनसुनी वायुको प्रभावका कारण आज प्रदेश १, बागमती, गण्डकी र लुम्बिनी प्रदेशका एक वा दुई स्थानमा मेघ गर्जन/चट्याङ्ग सहित भारी वर्षाको सम्भावना रहेको छ ।
मौसम पूर्वानुमान महाशाखाका अनुसार आज राति पनि प्रदेश १, गण्डकी, सुदूरपश्चिम र कर्णाली प्रदेशका एक वा दुई स्थानमा मेघगर्जन/चट्याङ्ग सहित भारी वर्षाको सम्भावना रहेको छ ।
यी नदीमा पानीको बहाव बढ्ने
त्यस्तै दाङस्थित पश्चिम राप्ती नदीको बगासोती जलमापन केन्द्रमा जलसतहले सतर्कता तह पार गरेको र बढ्दो रहेको तथा राप्ती जलाधारमा बर्षा भइरहेकोले तटीय क्षेत्र तथा डुबान भइरहने क्षेत्रहरुमा रहनुहुनेहरुले राती सम्मै उच्च सतर्कता अपनाउन बाढी पूर्वानुमान महाशाखाले जनाएको छ ।
आज महाकाली, कोशी, नारायणी र यिनका सहायक नदीहरू विशेषगरी सुनकोशी, त्रिशुली, मर्स्याङ्दी लगायतमा बहाव उल्लेख्य बढ्ने र केहीमा सतर्कता तह आसपास पुग्न सक्ने छन् । साथै मझौला नदीहरु बागमती, पश्चिम राप्तीमा बहाब बढ्ने र सतर्कता तह पार गर्ने तथा बबईको बहाव सतर्कता तह आसपास पुग्न सक्ने पनि महाशाखाले जनाएको छ ।
वि.सं.२०७८ भदौ २१ सोमवार ०९:३१ मा प्रकाशित
