हामी सबैकाे संसारन्यूज

पुष्पलाल पाण्डे, काठमाडौ । निर्वाचनको मुखैमा पुग्दा पनि विद्यार्थी युनियनको निर्वाचन होला नहोला संसय कायमै रहेको छ । कुनै समय विद्यार्थीको साझा संस्था मानिने स्ववियुमा नेतृत्व गरेका नेताहरु अहिले बिभिन्न पार्टी तथा पेशा व्यवसायको उच्च नेतृत्वमा छन । तर, तिनैलाई ओहोदा पहिल्याउने खुड्किलो बनिदिएको स्ववियु भने अहिले कोमामा गएको विरामी जस्तो भएको छ ।
पहिलोपटक त्रिभुवन विश्वविद्यालयमा २०२० सालमा स्वतन्त्र विद्यार्थी युनियनको निर्वाचन भएयता विद्यार्थी आन्दोलनले अनेक आकार प्रकार ग्रहण गरिसकेको छ । अझ राजनीतिक दलहरु प्रतिनिधित्व भएको समयमा यसले खुल्लारुपमा पार्टीको ऐजेण्डा बोकेर प्रजातन्त्रका लागि ठूलै योगदान दिएको इतिहास समेत हाम्रा सामु छ ।
२०२० देखि २०६५ सम्म आइपुग्दा स्ववियूले ठूलै आरोह अबरोह पार गरेको छ । यस वीचमा स्ववियू उसका कामले सम्मानित भएको छ । एक जमानामा स्ववियू भन्नासाथ विद्यार्थीहरुले गर्ने अपनत्व यसका गहना हुन । तर, पछिल्लोपटक विद्यार्थी संगठनहरुको क्रियाकलाप र तिनका नेतृत्वका व्यवहारका कारण स्ववियु हिजोको जस्तो अवस्थामा रहन सकेन ।
अझ ०६२-०६३ को आन्दोलन पछि त स्ववियुको आवस्यकता माथि नै बहश सुरु भइसकेको छ । यिनै बहशका विचमा प्रत्येक २ वर्षमा हुनुपर्ने स्ववियुको निर्वाचन जम्मा १४ पटक मात्र भएको छ । २०३० देखि २०३६ सम्मको ६ वर्षे प्रतिबन्ध बाहेक अरु समय स्ववियुको निर्वाचन हुनुपर्ने थियो । तर, प्रजातन्त्रको अत्यन्तै सहज वातवरणमा समेत पछिल्लो ९ वर्षमा स्ववीयु निर्वाचन हुन सकिरहेको छैन ।
आसन्न निर्वाचन पनि होला नहोला कै दोषाधमा छ । यसले के देखाएको छ भने इतिहासम अत्यन्तै सुन्दर मानिएको संस्था या वस्तुले अहिलेको आवश्यकता पूरा गर्न नसके त्यो अनावस्यक बन्दै जाँदो रहेछ । अहिले यस्तै अनावस्यक बन्दै गएको देखिएको छ, स्ववीयु ।

यसकारण कि त स्ववियुको खोरेजीको अहिलेको मागलाई साच्चै कार्यान्वयन गर्नै पर्दछ । होइन भने यस संस्थाका मुख्य सारथी विद्यार्थी संगठनको कर्मशैलीमा गुणात्मक परिवर्तन गरेर स्ववीयुलाई साच्चै विद्यार्थीमैत्री बनाउनु पर्छ ।
विद्यार्थी सं्गठनका पछिल्ला गतिविधिले स्ववियुका लागि चाहिने न्यूनम व्यवहार समेत प्रस्तुत नगरेको पाइएको छ । अहिले पनि स्ववियुलाई ‘मनि’ र ‘मसल’बाटै कब्जा गर्ने रणनीतिमा संगठन देखिएका छन् ।
यसैले आसन्न निर्वाचनमा भुल सुधार गर्दै विद्यार्थी संगठनले गुणस्तरीय स्ववीयु निर्माणको प्रक्रिया अवलम्बन गरेनन् भने यो इतिहासको महाभुल हुनेछ ।