Sansar News
काठमाडौं । प्रधानन्यायाधीश चोलेन्द्र शमशेर राणाले बन्दी प्रत्यक्षीकरणको निवेदन बाहेक अरु मुद्दाको पेसी नतोक्ने सहमतिलाई तोडेका छन् । विवादको किनारा नलाग्दासम्म अरु मुद्दाका पेसी नतोक्ने भनी सर्वोच्च अदालतका न्यायाधीशहरुसँग उनले सहमति गरेका थिए ।
तर, मंगलबार उनले बन्दी प्रत्यक्षीकरणको निवेदन बाहेकका मुद्दाको पनि पेसी तोकेका छन् । साथै उनले आफ्ना लागि समेत एकल इजलाससमेत तोकेका छन् । प्रधानन्यायाधीश राणाले आफ्नो एकल इजलाससहित अन्य ९ वटा इजलास तोकेका छन् ।
सोमबार पनि राणाले ६ वटा इजलासमा पेसी तोकेका थिए। उनले संयुक्त इजलास पनि तोकेका थिए ।
राणाले इजलास तोकेपछि अन्योलमा परेका न्यायाधीशहरु छलफल पछि इजलासमा सहभागी भएका थिए । न्यायाधीशहरुले बन्दी प्रत्यक्षीकरण निवेदनमा सुनुवाई नरोक्ने तर विवाद कायमै रहेसम्म प्रधानन्यायाधीशसँग ‘बेञ्च सेयरिङ’ नगर्ने निर्णय गरेका थिए ।
यसैबीच सोमबार रातिमात्रै नेपाल बार एशोसिएसनले निर्णय सार्वजनिक गर्दै आफूलाई इजलास नतोक्न प्रधानन्यायाधीश जबरालाई चेतावनी दिएको थियो । मंगलबारको पेसी तोक्ने निर्णयसँग आन्दोलनमा रहेका कानून व्यवसायी थप आक्रामक हुने देखिएको छ ।
वि.सं.२०७८ कात्तिक २३ मंगलवार ११:५७ मा प्रकाशित
