हामी सबैकाे संसारन्यूज

काठमाडौं । नेपालमा शिक्षाबाट बन्चित भएका, आर्थिक अभावमा उपचार गर्न नपाएका लगायत विभिन्न समस्यामा परेकाहरुका लागि सहयोग गर्ने उद्धेश्यले वरिष्ठ संगीतकार तथा चर्चित लोकगायक नारायण रायमाझीको नेतृत्वमा इशा फाउन्डेशन स्थापना गरिएको छ ।

म्याग्दी घर भई हाल अमेरिकाको मेरिल्याण्डमा रहेका समाजसेवी दम्पत्ती सवि थापा र इन्द्र थापा संरक्षक रहेको उक्त फाउन्डेशनको उपाध्यक्षमा निरु दर्लामी मगर, सचिबमा कमल सरगम, कोषाध्यक्षमा चन्द्रिका राना (चन्दा थापा) र सदस्यहरुमा टिका सानु, अलिफ खान, अर्जुन गिरि, कृष्ण रानाभाट, नेत्र चौलागाई, निशा कुँवर र मिना पुन रहेका छन् ।

शनिवार बाानेश्वरको  एभरेष्ट लाउन्जमा  सम्पन्न फाउन्डेशनको पहिलो बैठकले तत्काल टिका सानुको नेतृत्वमा दाङमा एक बिपन्न परिवारको घर बनाउन सहयोग गर्ने निर्णय गरेको छ । उक्त घर टिका सानुको संयोजकत्वमा निर्माण गर्न लागिएको फाउन्डेशनले जनाएको छ ।

बैठकमा अध्यक्ष रायमाझीले फाउन्डेशनमार्फत् दुःखी गरिबको पीडामा मल्हम बन्न लागिपर्ने बताएका थिए भने अनलाइनमार्फत् बैठकमा सहभागी संरक्षक सवि थापाले फाउन्डेशनमार्फत् बाबु आमा गुमाएका कारण शिक्षाबाट बन्चित भएका, गम्भीर प्रकारका रोगबाड पीडित भएका तथा प्राकृतिक विपत्तिमा परेकाहरुका लागि सहयोग गर्न फाउन्डेशनले महत्वपूर्ण भूमिका पूरा गर्ने बताएकी थिइन् ।

नेपाल रहँदा होस् वा अमेरिका पुगेर झण्डै दुई दशकदेखि दुःखी र गरिबको पीडामा मल्हम बनेर व्यक्तिगत तथा सामुहिक रुपमा निरन्तर समाजसेवामा गर्दै आएकी समाजसेवी सवि थापाले संसारभरी रहेका आफ्ना आफन्त, साथीभाइ तथा सम्पूर्ण नेपालीलाई फाउन्डेशनमार्फत् दुःखी र गरिबको पीडामा थौरै भएपनि मल्हम बनेर सहयोग गर्न अनुरोध समेत गरेकी छन् ।