हामी सबैकाे संसारन्यूज

काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले युद्धका बेला भएका कमी कमजोरीहरुको छानबिन गरी सत्यतथ्य सार्वजनिक गर्न प्रतिबद्ध रहेको जनाएका छन् । विस्तृत शान्ति सम्झौतामा हस्ताक्षर गरिएको १५ वर्ष पूरा भएको अवसरमा आइतबार एक प्रेस विज्ञप्ति सार्वजनिक गर्दै प्रचण्डले युद्धका बेला भएका कमजोरीको छानविन गरी सत्य तथ्य सार्वजनिक गर्न प्रतिवद्ध रहेको बताएका हुन् ।

‘आजसम्मका राजनैतिक उपलव्धीहरुप्रति गर्व गर्दै सो क्रममा भएका कमीकमजोरीहरुको छानविन गरी सत्य तथ्य सार्वजनिक गर्न हामी प्रतिवद्ध छौं’, प्रचण्डले विज्ञप्तीमार्फत भनेका छन् ।

युद्धलाई शान्तिमा रुपान्तरण गर्ने काम सम्पन्न भएपनि सो समयमा घटेका घटनाको सत्यतथ्य छानविन गरी सार्वजनिक गर्न र पीडितहरुलाई परिपुरण गर्न अझै बाँकी रहेको उनले बताएका छन् ।

शान्ती सम्झौतापश्चातको अवधिमा आफूहरुले नेपाली समाजका समस्याहरुलाई सम्बोधन गर्न राज्यको अग्रगामी पुनर्संरचना, लोकतन्त्रलाई संस्थागत गर्ने समावेशी समानुपातिक सहभागितामा आधारित सङ्घीय लोकतान्त्रिक गणतन्त्रको संविधान जारी गरी ऐतिहासिक रुपमा आदिवासी जनजाति, महिला, दलित, मुस्लिम, अल्पसंख्यक तथा युवाहरुको भूमिका बढाउने प्रयत्नमा उल्लेखनीय सफलता हासिल गरेको र यसमा गर्व रहेको प्रचण्डले जनाएका छन् ।

प्रचण्डले सार्वजनिक गरेको विज्ञप्ति