हामी सबैकाे संसारन्यूज

काठमाडौं । आँसु पुछ्दै प्रतिस्पर्धाको मैदान छाडेका वरिष्ठ नेता रामचन्द्र पौडेललाई राजनीति नछाड्न आग्रह गर्दै सभापतिका उम्मेदवार शेरबहादुर देउवा निवासमै पुगेका छन् । शनिबार राति बोहोराटारस्थित निवासमै पुगेर देउवाले पौडेललाई राष्ट्रका लागि तपाईँको आवश्यकता छ भन्दै राजनीतिबाट बाहिर जाने कुरा नगर्न आग्रह गरेका हुन् ।

‘देउवाले राष्ट्रका लागि तपाईँको आवश्यकता छ, राजनीतिबाट बाहिर हुने कुरा नगर्नुस् र स्वास्थ्य राम्रो राखेर बस्नुस् भन्नुभयो’, पौडेल सचिवालयले भनेको छ ।

पौडेलले भने महाधिवेशनमा सिद्धान्तभन्दा बाहिर अस्वस्थ प्रतिस्पर्धा देखेर प्रक्रियाबाटै आफु बाहिरिएको बताएका छन् । उनले स्वस्थ प्रतिस्पर्धा हुने वातावरण बनाउँदै कांग्रेसलाई कांग्रेसजस्तो बनाउन आग्रह गरेका थिए ।

महाधिवेशन स्थलबाट आँशु पुछ्दै बाहिरिएका पौडेलले शनिबार एक विज्ञप्ति जारी गर्दै सभापतिमा उम्मेदवारी नदिने बताएका थिए । पौडेल सक्रिय राजनीतिबाटै बाहिरिन खोजेको देखिएको छ ।