Sansar News
काठमाडौं । पहिलो चरणमा आफैं सभापतिको उम्मेदवार बनेका प्रकाशमान सिंह, विमलेन्द्र निधि र कल्याण गुरुङ्गले अस्वभाविक रुपमा शेरबहादुर देउवाको पक्षमा समर्थन गर्ने घोषणा गरे ।
समर्थनको घोषणा गरेका सिंहले देउवाको नेतृत्व नै सबैका निम्ति स्वीकार्यता भएसँगै आफुँले समर्थन गरेको बताए । सिंहले देउवाले आफ्नो कार्यशैली परिवर्तन गर्ने कुरामा सहमति जनाएको पनि बताए । उनले समर्थन गर्नुको पछाडिको कारण कार्यशैली परिवर्तन गर्न देउवाले गरेको बाचालाई अगाडि देखाएका छन् ।
तर, तेह्रौ महाधिवेशनभन्दा अगाडिदेखि नै देउवाको नेतृत्व र कार्यशैलीको विरोध गर्दै आएका सिंहको १८० डिग्रीमा भएको बोली परिवर्तनप्रति भने सबैले आश्चर्य मानेका छन् । उनी किन एकाएक कार्यशैली परिवर्तन गर्ने बचनमा प्रतिबद्ध भए सबैले अनौठा मानी हेरेका छन् ।
तर, वास्तविकता अर्के भेटिएको छ । कांग्रेस सुत्रले बताएअनुसार उपप्रधानमन्त्रीसहित राजनीतिक लेनदेन गरेसँगै सिंहले समर्थन जनाएका हुन् । दाबी गरिएअनुसार दोस्रो निर्वाचनको निश्चित भएसँगै चाक्सीबारीस्थित प्रकाशमान सिंहको निवासमा पुगेका देउवाले सिंहको मागलाई सम्बोधन गर्ने विश्वास दिलाएका थिए । उनले सिंहलाई गृह मन्त्रालयको जिम्मेवारी नै दिने सहमतिसमेत गरेका छन् ।
सिंहको प्यानलबाट महिला सभापतिमा लडेकी सुजतालाई पनि सहयोग गर्ने प्रतिबद्धता देउवाले गरेका छन् । उनले विधान नै संशोधन गरेर भएपनि महिला उपसभापति बनाउने बचन दिएका छन् । साथै सुजताको मागअनुसार रिक्त उद्योग वाणिज्यमन्त्रीको जिम्मेवारी दिने बचन दिएका छन् ।
सम्बन्धित समाचार
प्रकाशमान सिंह र विमलेन्द्र निधिले किन समर्थन गरे देउवालाई ?
वि.सं.२०७८ मंसिर २८ मंगलवार १७:४५ मा प्रकाशित
