हामी सबैकाे संसारन्यूज

काठमाडौं । नेकपा (माओवादी केन्द्र) को आइतवारदेखि सुरु भएको आठौं महाधिबेशनको दोस्रोदिन आजबाट बन्द सत्र सुरु भएको छ ।

बन्दसत्रको कार्यक्रम सन्चालनका लागि पार्टीका नेता कृष्णबहादुर महराको अध्यक्षतामा सात सदस्यीय अध्यक्ष मण्डल चयन गरिएको छ । जसको अध्यक्ष मण्डलमा गिरीराजमणी पोखरेल, गणेश साह, परशुराम तामाङ, पूर्णाकुमारी सुबेदी, परशुराम रम्तेल र रुपा महर्जन सदस्य रहेका छन् ।

तयसैगरी पार्टीका अध्यक्ष पुष्पकमल दाहाल ‘प्रचण्ड’ ले ‘२१ औं शताब्दीमा समाजवादको नेपाली बाटो’ शीर्षकमा वैचारिक तथा राजनीतिक दस्तावेज प्रस्तुत् गरेका छन् । सो दस्तावेजमाथि छलफलका लागि २५ विभिन्न समुह बनाएर छलफल सुरु गरिएको छ ।

बन्द सत्रमा पार्टी स्थायी कमिटीका सदस्य देवप्रसाद गुरुङले पार्टीको विधान मस्यौदा प्रस्तुत् गरेका छन् । विधान मस्यौदामा पार्टीको केन्द्रीय कमिटी २९९ सदस्यीय रहने, पदाधिकारीमा अध्यक्ष, वरिष्ठ उपाध्यक्ष, उपाध्यक्ष छ जना, महासचिव, उपमहासचिव दुईजना, सचिव तीनजना र कोषाध्यक्ष गरी १५ सदस्यीय पदाधिकारी रहने व्यवस्था प्रस्तावित गरिएको छ । साथै केन्द्रीय कमिटीमा महिलाको ३५ प्रतिशत, दलितको १५ प्रतिशत, मुश्लिमको ५ प्रतिशत प्रतिनिधित्व हुने व्यवस्था समेत गरिएको छ । सबै समूहबाट ४० वर्ष मुनिका युवाको २० प्रतिशत प्रतिनिधित्व अनिवार्य गरिएको छ ।
त्यस्तै केन्द्रीय कमिटीले १० प्रतिशत मनोनित गर्ने प्रस्ताव गरिएको छ भने पदाधिकारी र सबैतहका कमिटीहरुमा समावेशी प्रतिनिधित्व सुनिश्चित गर्ने प्रस्ताव गरिएको छ ।

मओवादी केन्द्रका अनुसार मंगलबार दिनभर समूहगत छलफल हुने र बुधबार विहान ११ बजेदेखि समूह प्रमुखहरुले समूहगत छलफलको निष्कर्ष प्रस्तुत् गर्ने कार्यक्रम रहेको छ ।

प्रचण्डको प्रतिवेदनमाथि २५ समूहको छलफल, हेर्नुहोस् कुन समूहको नेतृत्व कस्ले गर्दैछन् त ?