हामी सबैकाे संसारन्यूज

काठमाडौं । संस्कृति, पर्यटन तथा नागरिक उड्डयन मन्त्री प्रेम आलेले कोरोना महामारीको समयमा खाडी मुलुकमा काम गर्ने नेपाली श्रमिकको हवाई उद्धार गर्न गरिएको चार्टर फ्लाइटमा भएको अनिमियताको पुनः छानबिन थालेका छन् । उनले उक्त अनियमितताबारे छानबिन गर्न सहसचिव होमप्रसाद लुइँटेलको संयोजकत्वमा तीन सदस्यीय छानबिन समिति गठन गरेका हुन् ।

मन्त्री आलेले जनाएअनुसार १० दिनभित्र प्रतिवेदन पेस गर्ने गरि शुक्रबार छानबिन समितिको गठन गरिएको थियो । समितिले शुक्रबारदेखि नै छानबिन सुरु गरेको छ ।

तत्कालिन समय चार्टर फ्लाइट प्रकरण विवादमा तानिएपछि सहसचिव सुरेश आचार्यको नेतृत्वमा छानबिन समिति गठन भएको थियो । उक्त समितिले उक्त प्रकरणमा व्यापक अनियमितता भएको ठहर गरेको थियो । तर, आफुँसमेत कारबाहीमा तानिने अवस्था बनेपछि तत्कालिन मन्त्री योगेश भट्टराईले उक्त प्रतिवेदनलाई नै सार्वजनिक गराएनन् ।

पटक–पटक विवादमा तानिएपछि उनी पछिका मन्त्री उमाशंकर अरगरियाले पनि उक्त विवादित प्रकरणमाथि पुनः छानबिन गराएका थिए । तर, उनको प्रतिवेदनले औंल्याएका दोषीमाथि पनि कारबाही हुन सकेन ।

बेला–बेला चर्चामा आउने गरेको उक्त प्रकरणबारे तेस्रो पटक मन्त्री आलेले छानबिन थालेका हुन् । पहिलो र दोस्रो प्रतिवेदनले स्पष्टै रुपमै अनियमितता भएको ठहर गरेकोले उक्त प्रकरणमाथि पुनः छानबिन थालिएको मन्त्रालयले जनाएको छ ।

चर्को कमिसनको लेनदेनमा भएकाे थियाे चार्टरमा

कोभिड महामारीसँगै तत्कालिन समय आन्तरिक तथा बाह्य उडान रोकिएको थियो । नियमित बाह्य उडान रोकिएसँगै विशेषतः खाडी मुलुकमा रहेका नेपाली कामदारहरु अलपत्र परेका थिए । खाडीमा अलपत्र पर्ने नेपाली कामदारलाई नेपाल ल्याउन चार्टर फ्लाइटको व्यवस्था गरियो तर, २७ हजार लाग्ने साउदी अरबसम्मको भाडालाई झण्डै दुई लाखसम्म असुल गरियो ।

अनौठो विषय, नेपाल वायु सेवा निगमका जहाजहरु ग्राउण्डेड गराएर निजी क्षेत्रको हिमालय एयरलाइन्सलाई चार्टरमा प्रयोग गरिएको थियो । जसमा सिधै तत्कालिन मन्त्री योगेश भट्टराईको निर्णयअनुसार उक्त काम भएको थियो ।

झण्डै १० गुणासम्म महंगो भाडा लिएर गरिएको चार्टर फ्लाइटको प्रकरण सार्वजनिक भइरहँदा मन्त्रीसम्म कमिसनको लेनदेन भएको विषयसमेत बाहिरिएको थियो । तत्कालिन समय भाडा महंगो लिए वापत ४० प्रतिशतसम्म कमिसन व्यवसायीले मन्त्रीसम्मलाई दिएको कुरा कतिपय सञ्चारमाध्यमले प्रमाणसहित सार्वजनिक गरेका थिए ।

छानबिन समितिले पनि उक्त प्रकरणमा तालुकवाला मन्त्री, सचिवदेखि वायु सेवाका तत्कालिन जिम्मेवार पदाधिकारीलाई दोषी देखाएको थियो । तर, दुई/दुई पटक गरिएका छानबिन प्रतिवेदन नै सार्वजनिक गराइएन् ।

मन्त्री आलेले सञ्चारमाध्यमसँगको कुराकानीमा बताएअनुसार तत्कालिन पर्यटनमन्त्री योगेश भट्टराई उक्त प्रकरणमा पूर्णं जिम्मेवार छन् । छानबिन समितिले पनि उनलाई दाेषी ठहर्याएकाे छ ।