हामी सबैकाे संसारन्यूज

काठमाडौं । एमसीसी अनुमोदनमा मध्यमार्गी बाटो बनाउन माओवादी केन्द्र र एकीकृत समाजवादीबीच समझदारी भएको भन्ने चर्चाको माओवादी केन्द्रका नेता नारायणकाजी श्रेष्ठले खण्डन गरेका छन् । शुक्रबार केही सञ्चार माध्यम तथा सामाजिक सञ्जालमार्फत भएको चर्चाको नेता श्रेष्ठले खण्डन गरेका हुन् । उनले भ्रामक अफवाबाट जोगिन पनि अपिल गरेका छन् ।

यथास्थितिमा एमसीसी निणयार्थ पेश भए माओवादी केन्द्रले विपक्षमा मतदान गर्ने उनको भनाई छ ।

“संसदमा एमसीसी पेश गरिसकिएको सन्दर्भमा हाम्रो पार्टी यसलाई विफल पार्न विपक्षमा मतदान गर्छ, यसबारे मतदान हुँदा हाम्रो पार्टीले संसद बैठक बहिष्कार गर्नेछ र यथास्थितिमा यो प्रस्ताव अनुमोदन गर्न सहयोग पुर्‍याउनेछ भन्ने प्रचार गलत हो ”, नेता श्रेष्ठले भनेका छन्, “कसले यो भ्रमात्मक प्रचार अभियान सञ्चार माध्यममार्फत चलाउँदैछ ? सावधान !”

एमसीसी संशोधन नभई पारित गर्न नसकिने पक्षमा माओवादी केन्द्र स्पष्ट रहेको नेता श्रेष्ठले बताएका छन् । एमसीसीको सन्दर्भमा पार्टीको आठौं महाधिवेशन र त्यसपछिका छलफलका निष्कर्षमै आफ्नो पार्टी अडिग रहेको उनले स्पष्ट पारे ।

नेता श्रेष्ठले भनेका छन्, “हाम्रो पार्टीले आठौं महाधिबेशनबाट र त्यसपछिका सबै छलफलहरुबाट एमसिसि सम्झौताका बारेमा निकालेको निष्कर्ष र लिएको निर्णय स्पष्ट छ, एमसिसि सम्झौता यसका राष्ट्रिय सार्बभौमिकता,स्वाधीनता र हित प्रतिकुलका प्रावधानहरुलाई संशोधन नगरी यथास्थितिमा स्विकार नगर्ने र संसदबाट पारित नगर्ने। हामी त्यसैमा कायम छौं।”

शुक्रबार केही सञ्चार माध्यमले माओवादी केन्द्र र एकीकृत समाजवादी पाँच दलीय गठबन्धन नटुटाउने सर्तमा एमसीसी अनुमोदनको पक्षमा उभिएको समाचार प्रकाशित गरेका थिए । ति सञ्चारमाध्यमले केही नेताको भनाई भन्दै एमसीसी निर्णयार्थ पेश हुँदा माओवादी केन्द्र र एकीकृत समाजवादी संसद बैठकमा उपस्थित नहुने निर्णयमा पुगेको दाबी गरेका थिए ।