हामी सबैकाे संसारन्यूज

काठमाडौँ । नेपाल इन्भेष्टमेन्ट मेगा बैंकका प्रमुख कार्यकारी अधिकृत ज्योति प्रकाश पाण्डेलाई प्रहरीले पक्राउ गरेको सन्दर्भमा बैंकले आफ्नो धारणा सार्वजनिक गरेको छ ।
स्मार्ट टेलिकमको सम्पात्ति लिलामी प्रकरणमा संलग्न रहेको भन्दै बुधबार नेपाल प्रहरीको केन्द्रीय अनुसन्धान ब्यूरो(सिआईबि)ले पाण्डेलाई पक्राउ गरेको थियो ।

प्रेस विज्ञप्ति र बैंकको दाबी
सिआईबिको २०८३/०१/३० को प्रेस विज्ञप्तिको आधारमा विभिन्न सञ्चार माध्यममा प्रकाशित सामग्रीप्रति ध्यानाकर्षण भएको बैंकले जनाएको छ । बैंकले स्मार्ट टेलिकम प्रा.लि. को सम्पत्ति लिलाम बिक्री गर्दा प्रचलित ऐन, कानुन र आफ्नो कर्जा असुली निर्देशिकाको पूर्ण रूपमा पालना गरेको बैंकले दाबी गरेको छ ।

कर्जा असुली र कानुनी दायित्व
बैंकका अनुसार बैंक तथा वित्तीय संस्था सम्बन्धी ऐन, २०६३ को दफा ५७ र सुरक्षित कारोवार ऐन २०६३ ले दिएको अधिकार अन्तर्गत रही बैंकले कर्जा असुली प्रक्रिया अघि बढाएको हो । निक्षेपकर्ताहरूको हितको संरक्षण र कर्जा असुलीको कानुनी दायित्व पूरा गर्न यो कदम चालिएकोे बैंकले प्रष्ट्याएको छ ।

लिलामी प्रक्रिया र बाँकी रकमको विवरण
मिति २०८२/०६/०३ मा लिलामीको सूचना प्रकाशित गरी सोही अनुसार स्मार्ट टेलिकमका उपकरण र सम्पत्ति लिलाम गरेको जानकारी भन्दै बैंकले लिलामबाट प्राप्त कुल रु ४ अर्ब ६० करोड मध्ये रु ४ अर्ब २२ करोड सहवित्तीयकरणको कर्जा चुक्ता भुक्तान भएको बैंकद्वारा जारी गरिएको विज्ञप्तिमा जनाईएको छ ।

बाँकी रकम र रोक्काको कारण
स्मार्ट टेलिकमको सम्पत्ति लिलामी गरी उठाउन बाँकी रहेको रु ३८ करोड रकम बैंकको धरौटी रकम लिलामी खातामा जम्मा गरिएको बैंकले जनाएको छ । यो रकम दूरसञ्चार सेवासँग सम्बन्धित उपकरण जडान भएका घर–जग्गा धनीहरूलाई स्मार्ट टेलिकमले बुझाउनु पर्ने बाँकी घर बहाल र विद्युत महशुल भुक्तानीका लागि रोक्का गरिएको हो । बैंकले यो रकम सम्बन्धित निकायबाट प्रमाण सहित भुक्तानीको अनुरोध आए पश्चात् भुक्तानी गरिने प्रष्ट्याएको छ ।

बैंकको प्रतिबद्धता र आश्वसन
अनुसन्धान प्रक्रियामा पूर्ण सहयोग गर्ने र सम्बन्धित निकायबाट माग गरिएका सम्पूर्ण कागजात समयमै उपलब्ध गराउँदै आएको बैंकले जनाएको छ । यो अनुसन्धान प्रक्रियाले  दैनिक कार्य सञ्चालन, वित्तीय सुशासन र ग्राहक सेवामा कुनै नकारात्मक असर नपर्ने आश्वसन पनि बैंकले दिएको छ । आफ्ना निक्षेपकर्ता, ग्राहक र सेयर धनीहरूलाई ढुक्क रहन पनि बैंकले आग्रह गरेको छ ।

भविष्यको कदम
स्मार्ट टेलिकमको लिलामी र सोसँग सम्बन्धित विवादले टेलिकम क्षेत्र र बैंकिङ क्षेत्रमा पनि तरंग पैदा गरेको छ । सिआइबिको अनुसन्धानले के निष्कर्ष निकाल्छ ? र बैंकले आगामी दिनमा कसरी यो स्थितिलाई व्यवस्थापन गर्छ ? त्यो हेर्न बाँकी नै छ । तर, बैंकको प्रेस विज्ञप्तिले आफ्नो विषय प्रष्ट्याएको छ र कानुनको पालना गरेको दाबी पनि गरेको छ ।