हामी सबैकाे संसारन्यूज

नेपाली शिर यो झुकेन कहिले भन्छन् सबैले पनि
लुक्दैछन् घरमा बसेर किन हो दासी भए झैँ गरी
कस्तो नीति लियौ समस्त जग यो बेचेर खान्छन् अरे
बस्छौ के कसरी रहन्न घर यो सुत्छौ कता हो भरे।।१

कस्तो मान थियो समस्त जगमा नेपालको गौरव
नेपाली मन यो जलेछ अहिले भाग्छौ कुदी कौरव
गर्जिन्छन् जनता बसी सडकमा के काम गर्छाै अब
खेदौँ लौ अब ता मिलेर जनले बुझ्ने छ नेता तब।।२

आमाको तन जो थियो जति सबै चिर्दा रमायौ कति
पायौ के धनमा भुलेर ममता हाँसेर बस्छौ जति
पुर्खाले घर यो बसी भुवनमा शृङ्गार गर्दै धरा
मिल्दै साथ बसी समस्त जन ती हाँसेर बस्थे बरा।।३

पाएको मत जो बसी सडकमा लेख्दै छ तिम्रो कथा
सुन्दैनौ अव ता पुकार जनको भागेर जान्छौ कता
बेच्नेआँट नराख त्यो हृदयमा बेचेर नेपाल यो
झुक्दै छौ कसरी समाइ पदमा बेच्यौ सबै देश यो।।४

आँखामा जलको सुके गह सबै झर्दैन पानी कति
फुल्दैनन् वनमा पवित्र तुलसी मासेर खायौ जति
सुख्खाबोट भयो रहेन वन जो मास्यौ सबैले बसी
आयो दुष्ट बनेर यो मुलुकमा त्यो ब्यर्थको एम् सि सि।। ५

छन्द :शार्दूरविक्रीडित
सुत्र:SSS   IIS  ISI  IIS   SSI  SSI  S

उत्तम कुमार पोखरेल
लहान–९ सिरहा
हाल सूर्य विनायक–३ भक्तपुर