हामी सबैकाे संसारन्यूज

काठमाडौं । रुस र युक्रेनबीच जारी युद्धको प्रभाव कच्चा पेट्रोलियम तेलमा परेको छ । विश्वको दोस्रो ठूलो निर्यातकर्ता मुलुक रुस र युक्रेनको बीचमा युद्ध भएपछि पेट्रोलियम पदार्थको मूल्यले निरन्तर उचाई हासिल गरेको हो । फागुन १९ गते कच्चा तेलको मूल्य प्रतिब्यारेल ११६.२० अमेरिकी डलर पुग्यो । जबकी एक साताअघि कच्चा तेलको मूल्य प्रतिब्यारेल ९२ अमेरिकी डलर आसपासमा बिक्री भइरहेको थियो । फागुन १९ गते एकै दिन कच्चा तेलको मूल्य ३.२७ प्रतिशतले उकालो लागेको हो ।

आयल निगमको घाटा उकालोतर्फ
नेपाल आयल निगमले अहिले पेट्रोलमा प्रतिलिटर २० रुपैयाँ ५२ पैसा, डिजल र मट्टितेलमा प्रतिलिटर क्रमशः १६ रुपैयाँ ८ पैसा र १४ रुपैयाँ ६९ पैसा घाटा व्योरिरहेको छ । त्यस्तै, आन्तरिकतर्फको हवाई इन्धनमा १४ रुपैयाँ ४१ पैसा र बाह्य हवाई इन्धनतर्फ प्रतिलिटर ४८ रुपैयाँ ४४ पैसा र एलपी ग्याँसमा प्रतिसिलिण्डर ६६५ रुपैयाँ ३४ पैसा घाटा रहेको निगमले जनाएको छ ।

अन्तर्राष्ट्रिय बजारमा कच्चा तेलको मूल्य बढ्दै जाँदा निगमले सहँदै आएको घाटा अझै बढ्दै जाने देखिन्छ । यस अगाडि पनि निगमले घाटा पूर्ती गर्नका लागि बचतमा भएको, सञ्चिती रकम तथा मूल्य स्थिरिकरण कोषमा भएको रकम खर्च पनि गरिसकेको छ । अब बढ्दो घाटा पुर्तीका लागि निगमले मुल्यवृद्धि वा अन्य विकल्प अपनाउनुपर्ने देखिन्छ ।