हामी सबैकाे संसारन्यूज

काठमाडौं । सत्तारुढ नेकपा (माओवादी केन्द्र)को केन्द्रीय कमिटीको बैठक राष्ट्रियसभा गृहमा सुरु भएको छ । बिहान ११ बजेका लागि बोलाएको बैठक एमसीसीसम्बन्धी विवादमा शीर्ष नेताहरु छलफल गर्दा ढिला सुरु भएको हो ।

बैठकको पहिलो दिन आज अध्यक्ष पुष्पकमल दाहाल ‘प्रचण्ड’ र नेता नारायणकाजी श्रेष्ठले धारणा राख्ने कार्यसूची तय भएको छ । पूर्वनिर्धारित एजेण्डालाई एमसीसीले प्रभावित पार्ने देखिएको नेताहरूले बताएका छन् ।

एमसीसीको विषयमा छलफल भएपश्चात नै केन्द्रीय कमिटीको बैठकमा महाधिवेशनबाट बाँकी रहेका सांगठानिक कार्यविभाजन, स्थानीय तह निर्वाचनलगायतका एजेण्डामा बैठक प्रवेश गर्ने बताइएको छ । गत पुसमा आयोजित आठौं राष्ट्रिय महाधिवेशनले केन्द्रीय सदस्यमात्र चयन गरेको थियो । तिनै केन्द्रीय सदस्यहरुको पहिलो बैठकले अध्यक्षमा प्रचण्डलाई निरन्तरता दिने निर्णय गरेको थियो ।

तर, अमेरिकी सहयोग परियोजना एमसीसीलाई ब्याख्यात्मक घोषणासहित संसदबाट अनुमोदन गर्ने निर्णय गरेपछि माओवादीभित्र विवाद छ । एमसीसी अनुमोदन गर्ने निर्णयमा पूर्व एकता केन्द्र पक्षका नेताहरु तिव्र असन्तुष्ट छन् ।