हामी सबैकाे संसारन्यूज

काठमाडौं । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले आगामी निर्वाचनमा पहिलो जोड आफ्नै तागतमा निर्वाचन जित्ने गरी तयारी गरिरहेको बताएका छन् ।

आज सुदूरपश्चिमको धनगढी विमानस्थलमा पत्रकारहरुसँग कुरा गर्दै अध्यक्ष प्रचण्डले निर्वाचनमा सहायक रुपमा मात्रै अन्य दलसँगको तालमेल मिलाएर जाने बताएका छन् ।

उनले सहमति र समझदारीबाटै गठबन्धन अगाडि बढेको बताउँदै मुल नेतृत्वमा गठबन्धनलाई अगाडि बढाएर लैजानेमा कुनै दुबिद्या नभएको समेत बताए ।

‘कतिपय पार्टीभित्र विभिन्न टिप्पणी भए पनि मूल नेतृत्व पंक्तिमाा गठबन्धनलाई अगाडि बढाएर लैजानेमा दुविद्या छैन,’ अध्यक्ष प्रचण्डले भने,‘प्रधानमन्त्रीले केहीदिन अगाडि गठबन्धनलाई असर पार्ने गरी नबोल भनेर आफ्ना नेताहरुलाई निर्देशन जारी गर्नुभा’छ । त्यसैले पनि गठबन्धनमा कुनै अप्ठेरो तितो छैन ।’

त्यस्तै गायक प्रकाश सपुतको विवादित गीत ‘पिर’ का बारेमा अध्यक्ष प्रचण्डले आफुले सबै गीत सुन्न नपाएको बताउँदै गीतमा माओवादी आन्दोलनको एउटा पाटोको बारेमा कसैले चर्चा गर्दैमा आवेगमा आउनुपर्छ भन्ने नरहेको बताएका छन् ।

‘मानिसहरुले आफ्नो अनुभव, आफ्नो अनुभूति अनुसार आफ्नो गीत कविता बनाउँछन्, नाटक बनाउँछन् । डिबेट त हुन सक्छ तर माओवादी आन्दोलनको एउटा पाटोको रुपमा कसैले चर्चा गर्यो भनेर धेरै हामी आवेगमा आउनुपर्ने म ठान्दिनँ ।’ अध्यक्ष प्रचण्डले भने ।