हामी सबैकाे संसारन्यूज

काठमाडौं । रुस र युक्रेनबीच जारी युद्धको १९ औँ दिनमा चौथो चरणको वार्ता भएको थियो । दुई देशबीचको यो वार्ता युद्धको २० औं दिनमा पनि जारी रहनेछ ।

तर, सोमबार भएको वार्तामा दुई देशबीच मेलमिलापको कुनै बाटो भने निस्कन सकेको छैन । युक्रेनी राष्ट्रपति भोलोडिमिर जेलेन्स्कीले युद्ध अन्त्य गर्न र शान्ति स्थापना गर्ने प्रयासको एक भागको रूपमा इजरायली प्रधानमन्त्री नाफ्ताली बेनेटसँग कुरा गरेको बताएका छन्। यसै क्रममा रुसी विदेश मन्त्रालयको वक्तव्य युद्धको २० औं दिनमा आएको छ । रुसी विदेश मन्त्रालयले युक्रेनले प्रहार गरेको क्षेप्यास्त्रबाट आफ्ना २० जना सैनिकको मृत्यु भएको र २८ जना घाइते भएको बताएको छ ।

बताइएअनुसार मार्च १४ मा डोनेट्स्क क्षेत्रमा रहेको आवासीय परिसरमा तोचका(यू मिसाइलहरूद्वारा आक्रमण गरिएको थियो।

चेक गणतन्त्र, पोल्याण्ड र स्लोभेनियाका प्रधानमन्त्री कीभ जाने

चेक गणतन्त्र, पोल्याण्ड र स्लोभेनियाका प्रधानमन्त्रीहरूले युरोपेली संघका नेताहरूको प्रतिनिधिका रूपमा राष्ट्रपति भोलोडिमिर जेलेन्स्कीलाई भेट्न मंगलबार कीभ जाँदैछन् । समाचार एजेन्सी एएफपीले जनाएअनुसार पोल्याण्ड सरकारले युक्रेनको सार्वभौमसत्ता र स्वतन्त्रताको लागि सम्पूर्ण युरोपेली संघको स्पष्ट समर्थनलाई पुनस् पुष्टि गर्नु भ्रमण गर्न लागेका हुन् ।

रसियाको आक्रमण थप आक्रामक

युद्धको पछिल्ला दिन रुसले आक्रमणलाई थप आक्रामक बनाउन थालेको छ । रुसले कीभ केन्द्रीत आक्रमणलाई तिव्रता दिएको छ ।
मंगलबार राजधानी कीभमा कम्तीमा तीनवटा निकै शक्तिशाली विस्फोट भएको छ । समाचार एजेन्सी एएफपीका अनुसार निकै शक्तिशाली प्रकृतिको विस्फोट भएको थियो ।

यसैबीच यूक्रेनको सबैभन्दा ठूलो दोस्रो सहर खरेसान रुसको पूर्णं कब्जामा आएको छ । सञ्चार माध्यमले जनाएअनुसार युद्धको २० औं दिन रुसले उक्त सहरलाई पूर्णं कब्जामा लिएको हो ।

रुसले उक्त सहरमाथि युद्धको तेस्रो दिन नै आक्रमण गरेको थियो । जहाँ उसलाई बेलारुसले साथ दिएको थियो ।

जेलेन्स्कीले अमेरिकी संसदलाई सम्बोधन गर्ने

युक्रेनी राष्ट्रपति भोलोडिमिर जेलेन्स्कीले बुधबार अमेरिकी संसदलाई सम्बोधन गर्ने भएका छन् । रुससँग बहादुरीताका साथ लडिरहेको भन्दै अमेरिकी संसदले जेलेन्स्कीलाई सम्बोधनको निम्ता पठाएको हो । जेलेन्स्कीले यसअघि इयु र इयु आबद्ध देशका संसदलाई सम्बोधन गरेका थिए ।