Sansar News
काठमाडौं । चिट्ठाको प्रलोभनमा पर्दा एक शिक्षिकाले आफ्नो जीवनभरको कमाई गुमाएकी छन् ।
काठमाडौं महाराजगन्जकी ६५ वर्षीया अवकाशप्राप्त शिक्षिकाले चिट्ठाको प्रलोभनमा परि अपरिचित व्यक्तिको बैंक खातामा गत असोजमा २९ लाख ४० हजार रुपैयाँ पठाएकी थिइन् ।
महानगरीय अपराध महाशाखाले वृद्धा शिक्षिकालाई चिट्ठाको प्रलोभनमा पारी ठगी गरेको आरोपमा काभ्रेपलान्चोक मन्डन देउपुर ४ का ३८ वर्षीय गान्दीप गौतमलाई पक्राउ गरेको छ । महाशाखाका प्रहरी उपरीक्षक कृष्ण प्रसाद कोइरालाले पीडित महिलाको उजुरीमा गौतमलाई पक्राउ गरेको जानकारी दिएका छन् । पक्राउ परेका गौतमले उक्त रकम दुबईमा रहेका चुडामणि भट्टराई भन्ने व्यक्तिले आफुलाई उक्त रकम पठाएको दाबी गरेको बुधबारको गोरखापत्र दैनिकमा समाचार छ ।
ठगिएको रकममध्ये चुडामणि भट्टराईकी नेपालमा रहेकी श्रीमती गंगा बिसीको बैंक खातामा पाँच लाख पुगेको छ ।बिसीमाथि पक्राउ ुपर्जी जारी भएको र उनी फरार रहेको महाशाखाले जनाएको छ ।
पीडित शिक्षिकालाई विदेशी नागरिक डा. जोहान लोरेन्स बताउने अपरिचित व्यक्तिले ह्वाट्स एप मार्फत् ९० लाखको चिट्ठा र २ लाख पाउण्डको पार्सल, सुनका गहना पठाएको र त्यसबापत लाग्ने रकम पठाउन भन्दै ठगी गरेको खुलेको छ ।
यसअघि यस्ता कार्यमा भारतीय नागरिक लागेको पाइएकोमा हाल नेपाली युवा पनि यस्ता ठगी कार्यमा संलग्न रहेको प्रहरीले आशंका गरेको छ ।
वि.सं.२०७८ चैत २ बुधवार ०८:४१ मा प्रकाशित
