हामी सबैकाे संसारन्यूज

काठमाडौं । रुस र युक्रेनबीचको युद्धको आज २५ औं दिन हो । दुई देशबीच अहिलेसम्म कुनै सहमति हुन सकेको छैन ।

यसैबीच, एक प्रतिवेदनअनुसार रुसले फेब्रुअरी २४ मा सर्वत्र युद्ध सुरु गरेपछि युक्रेनमा ६४ बालबालिकासहित कम्तीमा ८४७ नागरिकको मृत्यु भएको छ। संयुक्त राष्ट्र मानव अधिकार कार्यालयका अनुसार, फेब्रुअरी २४ यता युक्रेनमा २ हजार २४६ नागरिक मारिएका छन । जसमध्ये ९४७ मारिएका छन् र १ हजार ३९९ घाइते भएका छन्।

संयुक्त राष्ट्रसंघीय निकायको विश्वास छ कि वास्तविक तथ्याङ्क योभन्दा निकै धेरै बढी छ।

रुसले घटायो हवाई आक्रमण

रुस–युक्रेन युद्धको २५ औं दिनमा युक्रेनी वायुसेनाले आफ्नो आकाशमा रुसी विमानको आवतजावत कम भएको दाबी गरेको छ । यूक्रेनले एकपछि अर्को गर्दै रुसी वायुसेनाको हेलिकप्टरहरू खसालेसँगै हवाई आक्रमणमा कमि आएको हो ।

तथापी, रुसले युक्रेनका १८ भन्दा बढी सहरमा एकैसाथ हवाई आक्रमणको तयारी थालेको छ । रुसको तयारी पछि ती सबै सहरमा आइतबार साइरन निरन्तर बजिरहेको छ। जानकारीका अनुसार सुमी, टेर्नोपिल, पोल्टाभा, खार्किभ, जापोरिझिया, किभ, ल्भिभ जस्ता शहरहरूमा आक्रमण हुन सक्ने सम्भावना छ ।

रुस–युक्रेन युद्धको बीचमा मारिउपोल काउन्सिलले एउटा चकित पार्ने खुलासा गरेको छ । यसअनुसार रुसी सेनाले मारियुपोलका जनतालाई जबरजस्ती रुस पठाईरहेको छ ।

उनीहरुलाई त्यहाँका दुर्गम सहरमा बनाएका शिविरमा राखिएको छ । जहाँ उनीहरुका कागजपत्रसहित अन्य प्रकारको अनुसन्धान भइरहेको छ । रसियाले मारियुपोललाई पनि निशाना बनाएको छ ।