हामी सबैकाे संसारन्यूज

काठमाडौं । नेपाल नागरिक उड्डयन प्राधिकरणले बक्यौता नतिर्ने सात एयरलाईन्स कम्पनीहरुलाई कारबाही गर्ने जनाएको छ ।

प्राधिकरणले पटक–पटक ताकेता गर्दा पनि आफ्ले तिनुपर्ने बक्यौता नतिरेपछि प्राधिकरणले आइतबार सूचना नै जारी गरेर सातदिन भित्र बक्यौता तिर्न आउन आग्रह गर्दै अन्यथा कारबाही गर्ने चेतावनी दिएको हो ।

प्राधिकरणद्धारा जारी सूचना अनुसार नेकोन एयर ४ करोड ७२ लाख २५ हजार ३४३ रुपैयाँ शिवानी एयर ५५ लाख ५१ हजार ५३ रुपैयाँ, गोरखा एयर २० लाख ३५ हजार २९ रुपैयाँ, माउण्टेन एयर ६ लाख १० हजार ८३४ रुपैयाँ, कस्मिक एयर ३ करोड ४७ लाख ५८ हजार ७० रुपैयाँ, स्काइलाइन एयरवेज ७ लाख ८० हजार ४०० रुपैयाँ र एयर काष्ठमण्डपले ७ लाख ३८ हजार ४४७ रुपैयाँ बक्यौता तिर्न बाँकी रहेको छ ।

प्राधिकरणले शुल्क नबुझाउने व्यक्ति तथा संस्थालाई भविष्यमा हवाई सेवा, विमानस्थल तथा प्राधिकरणसँग सम्बद्ध कुनै किसीमको काम कारबाही तथा व्यपार व्यवसायमा सहभागी हुन नपाउने गरी कालो सूचीमा राख्ने अधिकार प्राधिकरणसँग रहेकाले सोहि अनुसार कारबाही अगाडि बढाउने भएको भन्दै सूचना प्रकाशित भएको सातदिन भित्र प्राधिकरणलाई तिर्न बाँकी बक्यौता रकम बुझाउन आग्रह गरिएको छ ।