हामी सबैकाे संसारन्यूज

काठमाडौं । नेकपा (एमाले)का अध्यक्ष केपी शर्मा ओलीले संसद विघटन पार्टीको नेतृत्व जोगाउन बाध्यात्मक रुपमा गर्नुपरेको बताएका छन् । केन्द्रीय कमिटी बैठकलाई सम्बोधन गर्दै उनले प्रचण्डले नेतृत्व हत्याउन खोजेपछि संसद विघटनको विकल्प खोजिएको बताए ।

ओलीले प्रचण्ड नेतृत्वको माओवादी केन्द्रका नेताहरु तान्नुपर्ने बताएका छन् । उनले प्रचण्डको पार्टी सकेपछि मात्रै एकता सम्भव हुने बताए ।

“पुस ५ गते पार्टी जोगाउन संसद् विघटन गर्नु जरुरी थियो, पार्टी कब्जा गर्न षड्यन्त्र गरेपछि त्यो गर्नु जरुरी थियो”, ओलीले भनेका छन्, “यति बेला वामपन्थी एकता होइन पार्टी प्रवेश गर्नुपर्‍यो, प्रचण्डका मान्छे अझै यतातिर ल्याउनु पर्‍यो प्रचण्डको भाँडो रित्तो भएपछि प्रचण्डले पार्टी एकता गर्लान् नि त !”

ओलीले अब वामपन्थी एकताका नाममा अर्को गल्ती नगर्ने बताएका छन् । उनले माओवादीभित्रका पीडित जतिलाई एमालेमा समावेश गर्ने बताए ।

नेता घनश्याम भुसालले वामपन्थीका बीचमा एकता गर्नुपर्ने धारणा राखिरहेको बेला ओलीले यस्तो अभिव्यक्ति दिएका हुन् । ओलीले नेता भुसाललाई पार्टीको विचारअनुसार गतिविधि गर्न पनि निर्देशन गरेका छन् । उनले एमाले पार्टी हो भन्दै एमालेलाई ‘डिबेटिङ सोसाइटी’ बनाउने काम गर्न नहुने बताए ।

सम्बन्धित समाचार

ओलीको राजनीतिक प्रतिवेदन : एमालेलाई ‘धुलोपिठो’ पार्ने दाउमा छ गठबन्धन (पूर्णंपाठसहित)