हामी सबैकाे संसारन्यूज

काठमाडौं । गैर आवासीय नेपाली संघ (एनआरएनए) को दशौं अन्तर्राष्ट्रिय सम्मेलन तथा महाधिवेशन आजदेखि सुरु हुँदैछ ।

शनिवार बेलुका ४ बजेदेखि ललितपुरस्थित होटल हिमालयमा सुरु हुने उक्त सम्मेलनको उद्ुघाट राष्ट्रपति विद्यादेवी भण्डारी र समापन प्रधानमन्त्री शेर बहादुर देउवाले गर्ने संस्थाका अध्यक्ष कुमार पन्तले जानकारी दिएका छन् ।

परराष्ट्रमन्त्री नारायण खड्का पनि सहभागि हुने बताइएको उक्त कार्यक्रम एकताको महाधिवेशन भएको बताउँदै अध्यक्ष कुमार पन्तले सबैलाई सहभागि हुन र कार्यक्रमलाई सफल बनाउन आह्रवान गरेका छन् ।

संघको निर्वाचन रोक्न माग गर्दै परेको रिटमा उच्च अदालत पाटनले शुक्रबार अन्तरिम आदेश दिन अस्वीकार गरेपछि महाधिवेशन र विश्व सम्मेलन अगाडि बढाइएको हो । सम्मेलनमा संघका पूर्वअध्यक्ष डा. उपेन्द्र महतो, जीवा लामिछाने, भवन भट्ट लगायतले सम्बोधन गर्ने कार्यक्रम रहेको बताइएको छ ।

यसअघि अध्यक्षका उम्मेदवारहरु डा. बद्री केसी, कुल आचार्य र रविना थापाबीच आलोपालो नेतृत्व गर्ने सहमति भएबमोजीम बहुअध्यक्षीय प्रणालीको ब्यवस्था विधानमा गर्नुपर्ने भएकोले विधान संसोधन हुने बताइएको छ ।

महाधिवेशनले सहमति बमाेिजम विधान संशोधन गरि आवश्यक पद थप्ने तयारी भइरहेको आयोजक समितिले जनाएको छ ।

एनआरएनएनका पूर्व अध्यक्ष तथा हालका प्रमुख संरक्षक डा. शेष घले पक्षले भने बुधबारै छुट्टै महाधिवेशन र विश्व सम्मेलन गरि नयाँ कार्यसमिति घोषणा गरिसकेको छ ।

संस्थापन पक्षको निर्वाचन सम्पन्न भएसँगै कसले आधिकारिता पाउँने भन्ने विषयमा कानुनी लडाई हुने समेत देखिएको छ ।