Sansar News
काठमाडाैं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले नेपालमा श्रीलंकाको जस्तो आर्थिक संकटको अवस्थान नआउने बताएका छन् । रिपोर्टर्स क्लब नेपालको २४ औं वार्षिकोत्सव कार्यक्रमलाई सम्बोधन गर्दै प्रचण्डले आर्थिक संकटमा जान नदिन गठबन्धन सरकारले छिट्टै विशेष योजना ल्याउने बताए ।
“अर्थतन्त्रलाई दुर्घटनामा जानबाट रोक्न हामी छलफल गरेर योजना ल्याउँदैछौं”, अध्यक्ष प्रचण्डले भने, “श्रीलंकाको जस्तो अवस्थामा नेपाल जाँदैन ।”
उनले नेपालको अर्थतन्त्रमा केही गम्भीर संकटहरु भने देखिएको बताएका छन् । उनले छिट्टै सर्वपक्षीय छलफल गरेर समस्याहरु समाधान खोजिने बताए ।
आगामी चुनावमा गठबन्धन बन्ने कुरा प्रष्ट भएको प्रचण्डको भनाई छ । कांग्रेसले निर्णय गरेसँगै दुविधा हल भएको उनले बताए ।
प्रचण्डले माओवादी केन्द्रको पक्षमा निकै जनलहर आएको पनि बताएका छन् । उनले देशको संकटमोचनमा मुख्य भूमिका खेलिरहेको माओवादीको पक्षमा जनताहरु आर्कषित भएको बताए ।
वि.सं.२०७८ चैत १७ बिहीवार १२:३१ मा प्रकाशित
