हामी सबैकाे संसारन्यूज

काठमाडौं । शान्ति स्थापनार्थ कंगोको बालीमा खटिएका बेला बिद्रोहीको आक्रमणमा परेर मृत्यु भएका नेपाली सैनिकको पहिचान खुलेको छ ।

सुर्खेत गुर्भाकोट–१४ का सिपाही अनिल गुरूङको मंगलबार विद्रोहीको आक्रमणमा परि ज्यान गएको नेपाली सेनाले जनाएको छ ।

कंगोको इतुरी प्रदेशको डुगुटे क्षेत्रमा खटिएको नेपाली शान्ति सेनाको टोलीमाथि मंगलबार त्यहाँको बिद्रोही समुह कोडेको मिलिसियाले आक्रमण गरेको थियो । सोहि आक्रमणमा एक नेपाली सैनिकको मृत्यु भएको संयुक्त राष्ट्र संघले पनि पुष्टि गरेको छ ।

बिद्रोहीले अज्ञात स्थानबाट गरेको फायर आक्रमणबाट घाईते भएका गुरुङलाई लागि सैनिकको हेलिकप्टरमार्फत् उद्धार गरी बुनियाँस्थिल लेबल २ अस्पतालमा उपचारका लागि पुर्याएको र उपचारका क्रममा उनको मृत्यु भएको नेपाली सेनाको जनसम्पर्क निर्देशनालयले जनाएको छ ।

नेपाली सेनाका प्रधानसेनापति प्रभुराम शर्माले गुरुङको निधनले नेपाली सेनालाई स्तब्ध बनाएको बताउँदै परिवारजनमा समवेदना प्रकट गरेका छन् ।