Sansar News
काठमाडौं । सत्तारुढ गठबन्धन निर्वाचन तयारी तथा अनुगमन समितिको बैठकले निर्वाचनको मोडालिटी तयारी गर्ने जिम्मा शिर्ष नेतालाई दिने निर्णय गरेको छ ।
नेपाली कांग्रेसका वरिष्ठ नेता तथा समितिका अध्यक्ष रामचन्द्र पौडेलको नेतृत्वमा आज दिउँसो बसेको समितिको बैठकले निर्वाचनमा हुने तालमेलको मोडालिटी टुंगो लगाउने जिम्मा शिर्ष नेताहरुलाई दिने निर्णय गरेको हो ।
कांग्रेस नेता ज्ञानेन्द्र बहादुर कार्कीका अनुसार बैठकले जिल्ला तहबाट आएका प्रतिवेदन तथा सुझावमाथि छलफल गर्दै त्यसलाई शिर्ष नेतृत्वको बैठकमा पेश गर्ने निर्णय समेत गरेको छ ।
कार्कीले सोमबार बिहान ९ बजे बस्ने शिर्ष नेतृत्वको बैठकले स्थानीयतहको निर्वाचनमा गठबन्धनलाई कसरी प्रभावकारी बनाउने भन्ने बारेमा ठोस निर्णय हुने समेत बताए ।
चैत २२ गते बसेको गठबन्धनको बैठकले कांग्रेसका वरिष्ठ नेता पौडेलको नेतृत्वमा निर्वाचन तयारी तथा अनुगमन समिति गठन गरेको थियो ।
उक्त समितिमा कांग्रेसका गगन थापा, ज्ञानेन्द्र बहादुर कार्की, माओवादीका देव गुरुङ र वर्षमान पुन, समाजवादीका वेदुराम भुसाल र विजय पौडेल, जसपाका अशोक राई र रेनु यादव तथा राष्ट्रिय जनमोर्चाका हिमलाल पुरी सदस्य रहेका छन् ।
वि.सं.२०७८ चैत २७ आइतवार २०:२६ मा प्रकाशित
