हामी सबैकाे संसारन्यूज

चितवन । चितवनको भरतपुर महानगरपालिकाको मेयरमा नेपाली कांग्रेसका युवा नेता राम प्रसाद अधिकारीले दावी गरेका छन् ।

नेपाल विद्यार्थी संघको उपसभापति सम्हालिसकेका युवा नेता अधिकारीले आसन्न स्थानीय तहको निर्वाचनमा भरतपुर महानगरपालिकाको मेयरमा मनोनयन दर्ता गर्ने भएका हुन् ।

नेपाली कांग्रेसको भातृ संगठन नेपाल विद्यार्थी संघको केन्द्रीय प्रवक्ता र उपसभापति भएर काम गरिसकेका अधिकारी कांग्रेसभित्र इमानदार र कुशल संगठनकर्ताको छवी बनाएका नेता हुन् ।

विगत केहि वर्षदेखि जिल्ला केन्द्रित राजनीतिमा क्रियाशील भएका उनले भरतपुरमा दिर्घकालिन ढंगले विकास गर्नका लागि र कांग्रेसलाई बलियो बनाउँदै भरतपुरको मुहार फेर्न आफु सक्षम भएको जनाएका छन् ।

युवा नेता अधिकारी लामो समय नेविसंघको केन्द्रीय कार्यालयमा रही २०६२–६३ सालको आन्दोलन परिचालन गर्ने कुशल व्यवस्थापक समेत हुन् । उनको केन्द्रीय नेताहरुसँग राम्रो सम्बन्ध रहेको छ । सोही कारण आफूले केन्द्रको सहयोगमा धेरै राम्रा कामहरु गर्न सक्ने दावी गर्छन् ।

नेता अधिकारी २०७३ मा नेविसंघको केन्द्रीय उपसभापतिमा निर्वाचित भएका थिए । प्रदीप पौडेल नेविसंघ सभापति हुँदा उनी प्रवक्ता थिए । हालका कांग्रेस महामन्त्री विश्वप्रकाश शर्मा सभापति हुँदा अधिकारी केन्द्रीय सदस्य र कार्यालय सचिव भएर काम गरेका थिए ।

गिरीजा प्रसाद कोईराला प्रतिष्ठानका माध्यमबाट छवि फराकिलो बनाएका उनले गठबन्धनबाटै आफुलाई टिकट मिल्ने बिश्वास ब्यक्त गरेका छन् ।