Sansar News
काठमाडौं । सिभिल बैंकले ‘अद्वितीय नेपाल’ शिर्षकमा नयाँ वर्ष २०७९ सालको क्यालेण्डर सार्वजनिक गरेको छ ।
क्यालेण्डरमा नेपालका मुख्य पर्यटकीय गन्तव्यको तस्वीर र छोटो जानकारी समावेश गरिएको बैंकले जनाएको छ ।
जसका कारण कोभिड–१९ महामारीले थला परेको पर्यटन व्यवसायलाई उकास्न मद्दत पुग्ने विश्वास बैंकले लिएको छ । नयाँ नयाँ ठाउँको भ्रमणका लागि पर्यटकीय गन्तव्यहरुको खोजीमा क्यालेण्डरले सघाउने बैंकको विश्वास छ ।
क्यालेण्डरमा नेपालका नवीन अद्वितीय भ्रमण गन्तव्य स्थलहरु फोक्सुन्दो ताल, नार–फु उपत्यका, त्रिवेणी पाटन, पाँच पोखरी, गोल्डेन धाप, देउढुंगा, कञ्जचनजङ्घा बेस क्याम्प, सगरमाथा, गोक्यो ताल, कोरी डाँडा, खुमाइ डाँडा र धो–तरपको फोटो तथा छोटो टिप्पणी समावेश गरिएको बैंकले जनाएको छ । यस क्यालेण्डरका तस्वीरहरु ईमेज पसल डटकमबाट खरिद गरिएको तथा घुमन्तेद्वारा खिचिएको तस्वीहरु समावेश गरिएको बैंकको भनाइ छ ।
बैंकका प्रमुख कार्यकारी अधिकृत सुनिल पोखरेलले क्यालेण्डरमा समावेश गरिएका पर्यटकीय गन्तव्य स्थललाई मात्रै सीमित नगरी अन्य रमणीय ठाउँलाई पनि भ्रमणको गन्तव्य स्थल बनाउन सुझाव दिएका छन् ।
वि.सं.२०७८ चैत २९ मंगलवार २०:५८ मा प्रकाशित
