हामी सबैकाे संसारन्यूज

काठमाडौं। एनएमबि बैंक लिमिटेडले आर्थिक वर्ष २०८२/८३ को चौथो त्रैमास (Q4) को अपरिष्कृत वित्तीय विवरण सार्वजनिक गर्दै पहिलोपटक वार्षिक खुद नाफा ४ अर्ब रुपैयाँ नाघेको जनाएको छ।

बैंकका अनुसार आर्थिक वर्ष २०८२/८३ मा खुद नाफा ४०.६ प्रतिशतले वृद्धि भई ४ अर्ब १ करोड रुपैयाँ पुगेको छ। अघिल्लो आर्थिक वर्षमा बैंकले २ अर्ब ८५ करोड रुपैयाँ खुद नाफा कमाएको थियो।

बैंकको वितरणयोग्य नाफा १ अर्ब ८७ करोड रुपैयाँ रहेको छ भने प्रति शेयर वितरणयोग्य नाफा ९.०८ प्रतिशत कायम भएको जनाएको छ।

प्रभावकारी वासलात व्यवस्थापनका कारण बैंकको खुद ब्याज आम्दानी (Net Interest Income) १७.५ प्रतिशतले वृद्धि भई ९ अर्ब ४२ करोड रुपैयाँ पुगेको छ। त्यस्तै, डिजिटल तथा ट्रान्ज्याक्सन बैंकिङ कारोबार विस्तारसँगै शुल्क तथा कमिसन आम्दानी १६.६ प्रतिशतले बढेर २ अर्ब ८३ करोड रुपैयाँ पुगेको छ।

बैंकका अनुसार ट्रेजरी तथा वैदेशिक मुद्रा कारोबारमा सुधार आउँदा खुद ट्रेडिङ आम्दानी ८९ प्रतिशतले वृद्धि भई ६८ करोड १४ लाख रुपैयाँ पुगेको छ।

वित्तीय सूचकहरूमा पनि सुधार देखिएको बैंकले जनाएको छ। पुँजी प्रतिफल (Return on Equity) ११.५८ प्रतिशत तथा सम्पत्ति प्रतिफल (Return on Assets) १.०४ प्रतिशत पुगेको छ।

बैंकले वित्तीय अनुशासन, प्रभावकारी जोखिम व्यवस्थापन, डिजिटल सेवाको विस्तार तथा सुदृढ व्यवसायिक रणनीतिको परिणामस्वरूप उल्लेखनीय वित्तीय उपलब्धि हासिल भएको जनाएको छ। साथै आगामी दिनमा पनि ग्राहककेन्द्रित सेवा, नवप्रवर्तन र दिगो बैंकिङ अभ्यासलाई थप सुदृढ गर्दै मूल्य सिर्जना गर्ने प्रतिबद्धता व्यक्त गरेको छ।