हामी सबैकाे संसारन्यूज

विजय थापा, अमेरिका । अमेरिकाको क्यालिफोर्नियामा गाडीको ठक्करबाट एक नेपपाली युवाको मृत्यु भएको छ ।

प्रज्वल बिक्रम बिष्ट नामका ती ३२ बर्षिय नेपाली युवाले चलाएको कारलाई अर्को गाडीले ठक्कर दिँदा विष्टको मत्यु भएको हो ।

क्यालिफोर्निया राजमार्ग प्रहरीका अनुसार क्यालिफोर्नियाको साक्रामेन्टो शहरमा उक्त दुखद घटना भएको थियो ।

साक्रामेन्टो शहरस्थित वुडल्याण्ड पश्चिममा उक्त घटना हुँदा घटनास्थलमै उनको निधन भएको विष्टका माइला बुवा नेपालका चर्चित गायक तथा नेपालकै प्रथम पप सम्राट (पप किङ्ग) ओम बिक्रम बिष्टले जानकारी दिएका छन् ।

वरिष्ट गायक बिष्टका अनुसार आफ्नो गाडी रातो बत्तिमा बसी रहेको समयमा अर्को गाडीले ठक्कर दिएपछि उनको ज्यान गएको हो । उक्त घटना गत बिहिबार अप्रिल १४ का दिन राती ११ बजे घटेको हो ।

गत बर्ष मात्र क्यालिफोर्निया आएका स्व बिष्टले आफ्नी पत्नीको गाडी हन्डा सिभिक चलाई काममा जाने क्रममा उक्त दुर्घटना भएको भन्दै पप सम्राट बिष्टले दुःख व्यक्त गरेका छन् ।

मृतककी आमा मुना बिष्ट हाल नेपालमै रहेको र बाबु अनन्त बिक्रम बिष्ट १५ बर्षदेखि अमेरिकामै रहेको वरिष्ट गायक ओम बिक्रम बिष्टले जानकारी दिए ।

क्यालिफोर्निया राजमार्ग प्रहरीका अनुसार राजमार्ग १६ मा भएको उक्त दुर्घटनामा शेभ्रोलेट ईमपाला जातको गाडी ९७ राजमार्गमा जाने क्रममा स्व बिष्टको गाडीलाई ठक्कर दिएको थियो । प्रहरीका अनुसार विष्टलाई दुर्घटनास्थलमै मृत घोषणा गरिएको थियो ।

प्रहरीका अनुसार अर्का चालक गम्भीर घाइते भएका छन् । २५ बर्षिय चालकलाई युसि डेविस मेडिकल सेन्टर(चिकित्सा केन्द्र)मा उपचारको लागि राखिएको छ ।