हामी सबैकाे संसारन्यूज

काठमाडौं । सत्तारुढ गठबन्धनबीच चुनावी तालमेलको विषय थप पेचिलोपूर्णं बन्दै गएको छ । मुख्यतः ६ महानगरपालिका र ११ उपमहानगरपालिकामा दलहरुले आ–आफ्नो अडान नछाडेपछि तालमेलको विषय पेचिलोपूर्णं बन्दै गएको हो । सत्ता नेतृत्वमा रहेको नेपाली कांग्रेसले सबैजसो महानगर र उपमहानगरमा दाबी गरेको छ भने अन्य साझेदार दलहरुले पनि आ–आफ्नो पुरानै दाबी कायमै राखेका छन् ।

गत चैत २४ देखि निरन्तर तालमेलको मोडालिटी बनाउन दलहरुबीच छलफल भएपनि सहमति जुट्न सकेको छैन् । निर्णायक छलफल भनिएको भएपनि आइतबारको छलफल सबैका अडान यथावत रहेसँगै विना निष्कर्ष सकिएको थियो । सोमबार पुनः बैठक बोलाइएको भएपनि सहमति हुनसक्ने सम्भावना निकै झिनो रहेको नेताहरुले नै बताएका छन् ।

माओवादी केन्द्रका नेता हरिबोल गजुरेल कांग्रेससँगै एकीकृत समाजवादीको अडानले तालमेलको विषय पेचिलोपूर्णं बन्दै गएको बताउँछन् । उनका अनुसार दुई दलभित्रको विवाद बढ्दै जाँदा जसपाभित्र पनि विवाद बढ्न थालेको छ ।

“कांग्रेसभित्र तलदेखि नै अन्तरविरोध बढ्न थालेको छ, यहीबीचमा एकीकृत समाजवादीले एमालेको हैसियतअनुसार भागवण्डा खोजेको छ ।”, गजुरेलले भनेका छन्, “दुवैका अडानले विषय पेचिलो बन्दा जसपाभित्र अर्को विवाद देखिएको छ ।”

जसपाको बाबुराम भट्टराई पक्ष कतिपय ठाउँमा एमालेसँग सहकार्य गर्नुपर्ने लाइनमा देखिएको छ । भट्टराईले एमालेसँग सहकार्यको मोडालिटी तयार गर्न नेताहरुसँग बेग्लाबेग्लै भेटघाट पनि गरिरहेका छन् ।

पौडेल नेतृत्वको समितिको प्रस्ताव अलपत्र

आगामी चुनावमा तालमेल गर्ने मोडालिटी तयार गर्न सत्ता साझेदार दलहरुले कांग्रेस नेता रामचन्द्र पौडेल नेतृत्वमा निर्वाचन तयारी तथा अनुगमन समितिको गठन गरेका थिए । पौडेल नेतृत्वमा गठित समितिले ०७४ को निर्वाचनको नतिजाअनुसार मोडालिटी तयार गर्न प्रस्ताव गरेको थियो । समितिले तत्कालिन निर्वाचनमा जित्ने दलले नै उक्त स्थानीय तहमा दाबी गर्ने र बाँकीमा स्थानीय कमिटीको रिपोटिङ्गका आधारमा निर्णय गर्ने प्रस्ताव गरेको थियो ।

तर, सत्ता गठबन्धनको मुख्य दल कांग्रेसभित्रै उक्त विषयमा असन्तुष्टि छ । कांग्रेसभित्र ६ महानगरपालिकामै दाबी गर्नुपर्ने माग उठेको छ । ११ उपमहानगरमध्ये अधिकांशमा कांग्रेसले दाबी गरेको छ । ०७४ मा भएको निर्वाचनमा भने कांग्रेसले २ महानगर र २ उपमहानगरमा मात्रै जितेको थियो । तर, कांग्रेसले नेकपाको विभाजन र एमाले पनि विभाजित अवस्थामा भएको कारण सबै महानगर र उपमहानगर आफ्नो अनुकुल भएको दाबी गरिरहेको छ ।

‘मित्रवत प्रतिस्पर्धा’को प्रस्ताव

सत्ता साझेदार दलहरुबीच चुनावी तालमेल गर्ने विषय पेचिलोपूर्णं बनिरहेका बेला कांग्रेसभित्र ‘मित्रवत् प्रतिस्पर्धा’ गर्नुपर्ने धारणा आउन थालेको छ । शनिबार बसेको कांग्रेस केन्द्रीय कार्यसम्पादन समितिको बैठकमा नेताहरुले तालमेलको सम्भावना न्यून रहेको भन्दै महानगर र उपमहानगरमा मित्रवत् प्रतिस्पर्धा गर्नुपर्ने धारणा राखेका थिए ।

बैठकमा बोल्दै पार्टी महामन्त्री विश्वप्रकाश शर्माले स्थानीय नेता तथा कार्यकर्ताको भावना विपरित तालमेल गर्न नहुने प्रस्ताव बैठकमा राखेका थिए । उनले बैठकमा भनेका थिए, “भरतपुरमा कांग्रेसले पनि छोड्ने अवस्था छैन । माओवादी केन्द्रले पनि नछोड्ने बताइरहेको छ । स्थानीय भावना र स्थानीय आवश्यकताले भन्छ भरतपुरसहितका केही ठाउँमा मित्रवत् प्रतिस्पर्धा गर्नुपर्छ । यही नै सबैका लागि हितकर छ ।”

सत्ता साझेदार दलहरुले गत १७ चैतमै सातै प्रदेश, ७७ वटै जिल्ला र सात सय ५३ वटै पालिकामा संयन्त्र गठन गर्ने निर्णय गरेका थिए । चुनावी तालमेल गर्न बनाइएको संयन्त्र पछिल्ला विवादले अर्थहिन बन्न थालेको छ ।

सम्बन्धित समाचार

गठबन्धनभित्र बढ्दो किचलो : के भरतपुरमा तालमेलको सम्भावना सकिएकै हो ?