हामी सबैकाे संसारन्यूज

काठमाडौं । आगामी चुनावमा तालमेल गर्ने निर्णय गरेका सत्ता साझेदार दलहरुबीच आजै महानगरपालिका र उपमहानगरको भागवण्डा टुंग्याउने तयारी भएको छ । बालुवाटारमा सुरु भएको दोस्रो चरणको बैठकबाट भागवण्डाको विषय टुंग्याउने तयारी गरिएको गठबन्धनका नेताहरुले बताएका छन् ।

सोमबार पार्टी मुख्यालय पेरिसडाँडामा आयोजित पत्रकार सम्मेलनमा पनि माओवादी केन्द्रका अध्यक्ष पुष्पकमल दाहाल ‘प्रचण्ड’ले आजको बैठकबाटै चुनावी तालमेलको विषय टुंग्याउने बताएका थिए । उनले तालमेलको विषयमा सहमति नभए सहमति हुनेबीच तालमेल गर्नेबारे पनि तयारी भइरहेको बताएका थिए ।

पत्रकार सम्मेलनबाट प्रचण्ड फर्किएसँगै बालुवाटारमा गठबन्धनको दोस्रो चरणको बैठक सुरु भएको छ । बताइएअनुसार रामचन्द्र पौडेल नेतृत्वको निर्वाचन तयारी तथा अनुगमन समितिको प्रस्तावका आधारमा निर्णय गर्ने तयारी गरिएको छ । पौडेल नेतृत्वको समितिले ०७४ को निर्वाचन नतिजा परिणाम र पछिल्लो रिपोटिङका आधारमा भागवण्डा गर्न सुझाब दिएको थियो ।

तथापी, सत्ता गठबन्धनको मुख्य दल नेपाली कांग्रेस र एकीकृत समाजवादीको अडानले दलहरुबीच तालमेलको विषय सकस बनेको नेताहरुले बताएका छन् । माओवादी केन्द्रका नेता हरिबोल गजुरेलका अनुसार एकीकृत समाजवादीले एमालेकै हैसियतअनुसार भागवण्डा खोजेको छ ।

कुन दलले कहाँ दाबी गर्दै छन् ?

६ महानगरमध्ये नेपाली कांग्रेसले सबैजसो महानगर आफुँ अनुकुल भएको बताइरहेको छ । तथापी कांग्रेस सभापति शेरबहादुर देउवाले भरपुर, विरगञ्ज र पोखराको बारेमा निर्णय लिएका छैनन् । कांग्रेसले हालसम्म काठमाडौं, ललितपुर र विराटनगरमा दाबी गरेको छ ।

एकीकृत समाजवादीले काठमाडौं र पोखरा महानगरको नेतृत्व मागेको छ । यस्तै, समाजवादीले बुटवल, हेटौंडा र इटहरी उपमहानगरपालिकामा पनि आफ्नो नेतृत्व हुनुपर्ने दाबी गरेको छ ।

जनता समाजवादी पार्टी (जसपा)ले वीरगञ्ज महानगरपालिकाको नेतृत्व दाबी गरेको छ भने विराटनगर महानगरपालिकाको उपप्रमुख मागेको छ ।

माओवादी केन्द्रले भरतपुर महानगरपालिकासँगै बाराको जितपुर–सीमरा र दाङको घोराही उपमहानगरपालिकाको नेतृत्व दाबी गरेको छ ।

एकीकृत समाजवादीबाहेक दावीकर्ता दलहरुले नै कांग्रेसलाई काठमाडौं, ललितपुर र विराटनगर महानगरपालिकाको नेतृत्व लिन प्रस्ताव गरेको बताइएको छ ।