हामी सबैकाे संसारन्यूज

काठमाडौं । दिगो बैंकिङ अन्तर्गत नबिल बैंकले गैरसरकारी संस्था सामाजिक परिवर्तनका लागि परोपकारी अभियान (पिआइएससी) द्वारा आयोजित ‘युवा उद्यमशीलता मार्फत दिगो विकास लक्ष्यहरू प्राप्त गर्ने’ विषयमा सञ्चालित कार्यशालाको प्रायोजन गरेको छ ।

उक्त कार्यशाला गत चैत्र २५ र चैत २६ गते काठमाडौंमा भएको थियो । बैंकको तर्फबाट नायब महाप्रबन्धक आदर्श बजगाईं र पिआइएससी नेपालका कार्यकारी निर्देशक प्रवीण खनालले युवा उद्यमशीलतालाई मद्दत र प्रवर्द्धन गर्ने उक्त प्रायोजन सम्झौतामा हस्ताक्षर गरेका थिए ।
युवा उद्यमशीलता मार्फत दिगो विकास लक्ष्यहरू प्राप्त गर्न आयोजित दुई दिने कार्यशालामा विभिन्न विश्वविद्यालयका विद्यार्थी, इच्छुक उद्यमी लगायतले उद्यमशीलता विकासका लागि आफ्नो विचार र अवधारणा नोट प्रस्तुत गरेका थिए। उत्कृष्ट अवधारणा पिआइएससी नेपालद्वारा प्रकाशित पुस्तिकामा प्रकाशित गरिने आयोजक संस्थाले बताएको छ ।

कार्यशालाबाट अब्बल छानिएका अवधारणा तथा कार्यपत्रहरूलाई नबिल बैंकले आवश्यक परेमा बैंकको नीतिको अधिनमा रही विभिन्न बैंकिङ सेवाहरू प्रदान गर्ने बताएको छ । कार्यशालामा बोल्दै बैंकका नायव महाप्रबन्धक आदर्शले युवा उद्यमशीलता मार्फत आर्थिक वृद्धि तथा दिगो विकाशका लक्ष्यहरू हसिल गर्नुपर्ने बताए । साथै, बैंकमा दिगो बैंकिङ सम्बन्धी छुट्टै विभागले यस सम्बन्धमा काम गर्दै आइरहेको समेत जानकारी गराए ।

संस्थाका कार्यकारी निर्देशक प्रवीण खनालले ‘बजार कहिल्यै मर्दैन– उद्यमशीलता कहिल्यै मर्दैन’ भन्दै राष्ट्र निर्माणका लागि युवा उद्यमशीलता महत्वपूर्ण रहेकोमा जोड दिए । साथै, नेपाल महिला उद्यमी महासंघकी अध्यक्ष निरु रायमाझी खत्रीले राष्ट्रको आर्थिक उन्नतिमा महिलाद्वारा संचालित व्यवसाय–उद्यमलाई प्रवर्धन गर्नुपर्ने बताइन् ।