हामी सबैकाे संसारन्यूज

काठमाडौँ । स्थानीय तह निर्वाचनमा भरतपुर महानगर पालिकामा एमाले पार्टीका तर्फबाट उम्मेवार बनेका विजय सुवेदीले प्रदेशसभा सदस्य पदबाट राजीनामा दिएका छन् ।

उनले पार्टीले भरतपुर महानगर पालिकाको प्रमुख पदमा उम्मेदवारी दिन प्रदेशसभा सदस्य पदवाट राजीनामा गर्न निर्देशन दिएकाले आफ्नो राजीखुसीले राजीनामा दिएको बताएका छन् । बागमती प्रदेशसभाका सभामुख सानुकुमार श्रेष्ठलाई बिहीबार भेटेर सुबेदीले सांसद पदबाट राजीनामा दिएका हुन ।

‘एमालेले भरतपुर महानगर पालिकाको प्रमुख पदमा उम्मेदवारी दिन प्रदेशसभा सदस्य पदवाट राजीनामा गर्न निर्देशन दिएकाले मैले मेरो राजीखुसीले आज २०७९ वैशाख ८ गते दिनको २ः ४४ वजे हेटौडा प्रदेश सभा सचिवालयमा गई माननीय सभामुख समक्ष प्रदेशसभा सदस्य पदवाट आजैका मितिवाट लागु हुनेगरी राजीनामा दिएको छु।’ सामाजिक सञ्जालमार्फत उनले सो कुराको जानकारी गराएका छन् ।

निर्वाचन आयोगको स्थानीय तहको आगामी निर्वाचनमा उम्मेदवारी दिन बहालवाला जनप्रतिनिधिले राजीनामा गर्नुपर्ने बाध्यतात्मक प्रावधान अनुसार सुवेदीले राजीनामा दिएका हुन् । स्थानीय सरकार सञ्चालन ऐन २०७४ मा अध्यक्ष–मेयरले उपाध्यक्ष–उपमेयरलाई र उपाध्यक्ष–उपमेयरले अध्यक्ष–मेयरलाई राजीनामा दिनुपर्ने व्यवस्था छ ।

सुबेदीलाई एमाले चितवनले महानगरको मेयरको उमेदवारमा उठाउने सर्वसम्मत निर्णय गरिसकेको छ ।