हामी सबैकाे संसारन्यूज

काठमाडौं । मधेश प्रदेशका कानुन, न्याय तथा प्रदेशसभा मामिलामन्त्री प्रमोद यादवले राजीनामा फिर्ता लिएका छन् । मेयरमा उठ्ने तयारी स्वरुप यादवले आइतबार पदबाट राजीनामा दिएका थिए । तर, मेयरको टिकट पक्का नभएपछि उनले फिर्ता लिएका हुन् ।

उनले दिएको राजीनामा स्वीकृत भइसकेको थिएन । उनले मेयर पदमा टिकट पाउने निश्चित नभएपछि हत्तपत्त पुनः फिर्ता लिएका थिए ।

यादव नेकपा (एकीकृत समाजवादी)का तर्फबाट प्रदेश सरकारमा सहभागि छन् । उनी तत्कालिन नेकपाबाट सिरहाको निर्वाचन क्षेत्र नं. ३ ‘ख’बाट निर्वाचित भएका थिए ।

यादव नेकपा (एस)का सिरहा जिल्ला अध्यक्षसमेत हुन् ।

“मेयरको टिकट पाउने सुनिश्चित नभएपछि दिएको राजीनामा मैले फिर्ता लिएको हुँ”, यादवले सञ्चारमाध्यमसँग भनेका छन्, “सिरहा नगरपालिकामा सत्ता पक्षीय गठबन्धन गरेर नेकपा एसलाई नै मेयर पद दिने भन्ने मौखिक सहमति भए पनि व्यवहारमा नमान्दा म पछाडि हटेँको हुँ ।”

यादवले चलाखाइँपूर्वक प्रदेशसभाबाट राजीनामा नदिएको बुझिएको छ । यादवले मन्त्री पदबाट मात्रै राजीनामा दिएका थिए ।