हामी सबैकाे संसारन्यूज

काठमाडौं । जनता समाजवादी पार्टीका संघीय परिषद्का अध्यक्ष डा. बाबुराम भट्टराईले स्थानीय तहको निर्वाचन लोकतन्त्रलाई गाउँ टोलसम्म पर्याउने एउटा अभियान भएको बताएका छन् । अध्यक्ष भट्टराईले आइतबार पार्टीको घोषणापत्र सार्वजनिक कार्यक्रममा बोल्दै यस्तो बताएका हुन् ।

उनले भने, ‘स्थानीय निर्वाचन ३५ हजार जनप्रतिनिधि निर्वाचित भएर लोकतन्त्रलाई गाउँ, वडा र टोलसम्म पुर्याउने एउटा अभियान हो । त्यसैले यो निर्वाचनमा हाम्रो पार्टीको विचारमा प्रदेश र संघको निर्वाचनभन्दा पनि बढी महत्वपूर्ण छ ।’  उनले आफूहरुले घोषणापत्रमा भ्युटावरको कुरा नगरेको बताए । शिक्षा र स्वास्थ्य कसरी सर्वसुलभ बनाउने, निःशुल्क बनाउने, गुणस्तर बनाउने र घरघरमा पुर्याउने भन्ने जस्ता प्राथमिकता आफूहरुको रहेको उनको भनाइ छ ।

भट्टराईले डोजरे विकास भनेर जतासुकै भत्काउँदै हिँड्ने प्रवृत्तिलाई पनि आफूहरुले नयाँ ढंगले लैजाने बताए । त्यसप्रति उनले प्रतिबद्धता व्यक्त गरे । उनले भने, ‘लोकतन्त्रलाई घर दैलोमा पुर्याउने र विकास पनि माथिबाट लाद्ने होइन, तलबाटै ल्याउने हाम्रो मुख्य प्रतिबद्धता छ । हाम्रा प्रतिबद्धता विशिष्ट र नवीन छ’ ।