Sansar News
काठमाडौं । नेकपा एमाले रुपन्देहीले पार्टीको निर्णय विरुद्ध गएर स्वतन्त्र उम्मेदवारी दिएका तथा अन्य क्रियाकलापमा संलग्न रहेको भन्दै रुपन्देहीका १५ सहित २१ जनालाई कारबाही गरेको छ ।
सो पार्टीका लुम्बिनी प्रदेश कमिटीका अध्यक्ष राधाकुष्ण कँडेल र जिल्ला कमिटी रुपन्देहीका इन्चार्ज तेजेन्द्र केसीले विज्ञप्ति जारी गर्दै पार्टी निर्णयका विरुद्ध लागेका लुम्बिनी प्रदेश कमिटीका ६ जनालाई पार्टीको साधारण सदस्य समेत नरहने गरी कारबाही गरिएको बताएका छन् ।
कँडेलका अनुसार पार्टीको साधारण सदस्य समेत नरहने गरी कपिलवस्तुका कुमार मधु वेल्वासे, पाल्पाका राम बहादुर रावल र दिनेश रावल, प्युठानका टिका बहादुर गुरुङ तथा रुपन्देहीका संन्जय गुप्ता र बाबुलाल यादवलाई कारबाही गरिएको बताएका छन् ।
‘पार्टीका निम्ती यसप्रकारको अनुशासनहिनता क्षम्य हुँन सक्दैन । तसर्थ उल्लेखित व्यक्तिलाई आजकै मितिदेखि लागु ुहने गरी पार्टीका सबै जिम्मेवारीबाट निष्कासन गरिएको जानकारी गराइन्छ ।’ विज्ञप्तिमा भनिएको छ ।
त्यसैगरी एमालेले पार्टीका विरुद्ध गएर स्वतन्त्र उम्मेदवारी दिएका १५ जनालाई पनि साधारण सदस्य समेत नरहने गरी कारबाही गरेको विज्ञप्ति जारी गरेको छ ।
वि.सं.२०७९ वैशाख १९ सोमवार १५:२३ मा प्रकाशित
