Sansar News
काठमाडौं । नेपाली कांग्रेसले भ्रातृ सङ्घ र संस्थाका अधिवेशन स्थगन गर्न आग्रह गरेको छ । कांग्रेसले पार्टी आबद्ध भ्रातृ सङ्घ र शुभेच्छुक संस्थाहरूलाई आफ्ना पूर्व निर्धारित अधिवेशन तथा महाधिवेशन हाललाई स्थगन गर्न अनुरोध गरेको हो ।
कांग्रेसले यही वैशाख ३० गते हुने स्थानीय तहको निर्वाचनमा पार्टीका उम्मेदवार तथा गठबन्धनमा रहेका दलसँग तालमेल गरिएका उम्मेदवारलाई विजयी बनाउन पार्टीका सम्पूर्ण साङ्गठनिक संरचना, भ्रातृ सङ्घ, शुभेच्छुक संस्थालगायत विदेशस्थित जनसम्पर्क समिति क्रियाशील रहेकाले भ्रातृ सङ्घ र संस्थालाई अधिवेशन स्थगन गर्न अनुरोध गरेका छन् । कांग्रेसले निर्वाचनको अन्तिम परिणाम प्राप्त हुनेवित्तिकै अधिवेशन तथा महाधिवेशनको नयाँ कार्यतालिका निर्धारण गरी तदनुरुप गर्न सम्बद्ध सबैमा आग्रह गरेको हो ।
साथै कांग्रेसले निर्वाचनमा पार्टीका उम्मेदवार तथा गठबन्धनमा रहेका दलसँग तालमेल गरिएका उम्मेदवारलाई विजयी बनाउन सक्रियतापूर्वक लाग्न अनुरोध समेत गरेको छ ।
वि.सं.२०७९ वैशाख २१ बुधवार १६:२८ मा प्रकाशित
