हामी सबैकाे संसारन्यूज

काठमाडौं । नेपाली कांग्रेसका वरिष्ठ नेता रामचन्द्र पौडेलले कांग्रेसको प्रतिस्पर्धी एमाले मात्रै भएको बताएका छन् । चितवनमा सत्तागठबन्धनले आयोजना गरेको चुनावी सभामा बोल्दै उनले माओवादी केन्द्र कांग्रेसको मित्र शक्ति भएको बताए ।

“कांग्रेसको प्रतिपर्स्धी माओवादी होइन। एमाले हो”, उनले भनेका छन्, “माओवादी प्रतिस्पर्धी नभएकोले ऊसँग सहकार्य आवश्यक छ।”

कुनै एउटा दलको बहुमत नआउने र गठबन्धन सरकार बनाउनुपर्ने भन्दै उनले माओवादी केन्द्रसँग सहकार्य गर्नु परिस्थितिको उपज भएको बताए । उनले भनेका छन्, “भोलि मिलेर सरकार बनाउनु छ भने स्थानीय चुनाव किन नमिल्ने ?”

गठबन्धन नभएको भए केन्द्र सरकारदेखि प्रदेश सरकारसम्म कांग्रेसले बनाउन नसक्ने पनि उनले बताएका थिए। गठबन्धनकै कारण राष्ट्रिय सभा सदस्य निर्वाचनमा पनि कांग्रेसलाई फाइदा पुगेको उनले बताए।

एमाले अध्यक्ष केपी शर्मा ओलीले मुलुकलाई अस्थिरतातिर लैजान खोजेकाले गठबन्धन गर्नु परेको पौडेलको भनाई छ । उनले ओलीले दुईपटक प्रतिनिधि सभा विघटन गरेको बताए। ओलीले प्रतिनिधि सभा विघटन गर्दा आफूले २०१७ साल पुष १ गते सम्झिएको पौडेलले बताए।