हामी सबैकाे संसारन्यूज

काठमाडौं । पर्वतको पैयूँ गाउँपालिकामा नेकपा (एमाले)को तर्फबाट उपाध्यक्ष पदकी उम्मेदवार यामकुमारी राना पैसासहित समातिएको विषयले पैयूँको राजनीतिमा तरंग सिर्जना गरेको छ । राना मौन अवधि सुरु हुनै लाग्दा मंगलबार राती पैयूँ ४ बेशिथोकबाट समातिएकी थिइन् । उनलाई स्थानीयले पैसासहित समातेर प्रहरीकोमा बुझाएका थिए ।

इलाका प्रहरी कार्यालय पैयूँका अनुसार रानालाई ५४ हजार ५ सय नगदसहित स्थानीयले मंलगबार राती प्रहरीको बुझाएका थिए । प्रहरीले रानालाई सर्वपक्षीय छलफल पछि छाडेको थियो । रानालाई पक्राउ गरिएको र छाडिएको घटनापछि अहिले पैयूँको राजनीति तात्तिएको छ ।

वाम लोकतान्त्रिक गठबन्धनले एमालेलाई मतदातालाई लोभ्याउने अवान्छित क्रियाकलाप रोक्न चेतावनी दिएको छ । घटनाबारे गठबन्धनको तर्फबाट एक विज्ञप्ति सार्वजनिक गर्दै गठबन्धनको चुनाव परिचालन समितिका संयोजक एक नारायण न्यौपानेले स्थानीय प्रशासनलाई घटनाको छानबिन गरी अबिलम्ब कारबाहीको माग गरेका छन् । उनले यस्ता क्रियाकलाप नदोहो¥याउन पनि एमालेलाई चेतावनी दिएका छन् ।

यता, नेकपा (एमाले)ले भने उक्त घटना गलत मनासायसाथ गरिएको भन्दै घटनामा सलग्नमाथि कारबाहीको माग गरेको छ । एमालेले पैसा समातिएको विषय झुट भएको भन्दै आफ्ना उम्मेदवारलाई गठबन्धनका कार्यकर्ताले आक्रमण गरेको आरोप लगाएको छ । एमालेले उम्मेदवार रानामाथि गरिएको आक्रमणको छानबिन गरि कारबाहीको माग गरेको छ ।

एमालको पैयूँ गाउँपालिकाले जारी गरेको विज्ञप्तिमा रानामाथि आक्रमण गर्ने र अभद्र व्यवहार गर्ने सबैमाथि छानबिन गरि कारबाहीको माग गरिएको छ । घटनाबारे एमालेको जिल्ला कमिटी पर्वत र पैयूँ कमिटीले बेग्लाबेग्लै विज्ञप्ति निकालेर स्थानीय प्रशासनलाई अबिलम्बन छानबिन गरी कारबाहीको माग गरेका छन् ।

मलाई फसाउन खोजियो : राना

पैसासहित समातिएकी एमाले उम्मेदवार यामकुमारी रानाले भने आफ्नो राजनीतिक करिअर नै समाप्त पार्ने नियतसहित आफुँविरुद्व घटना घटाइएको आरोप लगाएकी छिन् । आफु चुनाव प्रचार प्रसारको काम सकेर बिरामी आफ्ना कान्छा ससुरालाई भेट्न गइरहेको बेला उक्त घटना योजनाबद्ध घटाइएको उनको आरोप छ ।

उनले कांग्रेस र माओवादीका कार्यकर्ताले आफुँमाथि आक्रमण गर्दै कागजपत्र र पर्ससमेत नियन्त्रणमा लिई चरित्रहत्या गर्ने योजनाअनुसार प्रहरीमा पु¥याएको दाबी गरेकी छिन् । उनले घटनामा संलग्नको नामसहित कारबाहीको पनि माग गरेकी छिन् ।