हामी सबैकाे संसारन्यूज

काठमाडौं । नेकपा (एमाले) झण्डै ९ महिना पछि संसद अवरोध गर्नबाट पछि हटेको छ । मंगलबारदेखि सुरु भएको प्रतिनिधिसभाको बजेट अधिवेशनमा एमाले सहभागि भएको हो ।

संसदमा विशेष समय लिएर सम्बोधन गर्दै एमाले उपमहासचिव तथा सांसद प्रदीकुमार ज्ञवालीले एमालेले विरोधको शैली परिवर्तन गरेको बताए । उनले एमालेले राखेका मागहरु भने यथावत नै रहेको बताए । उनले एमाले विभाजन गराउन खोज्नेहरु जनमतबाट किनारा लाग्दै गरेको बताए ।

“भर्खरै सम्पन्न निर्वाचनमा जनताले उचित ढंगले फैसला गरेका छन्, दल विभाजनका लागि जस्केलाबाट अध्यादेश ल्याउने, दल विभाजन पूरा भएपछि फिर्ता लिने सभामुख जस्तो गरिमायम संस्था कुनै न कुनै रुपमा जोडिने, अदालतमा यस मामिलामा सहयोगी बन्ने, अन्य मानिस पनि सहयोगी बन्ने स्थिति असहज हो र असहज रहने छ”, संसद अवरोध खुलाउनुको कारणबारे बोल्दै उनले भने, “यस विषयमा हाम्रा धारणाहरु निरन्तर रुपमा रहनेछन् तर पनि मुलुक एउटा कोर्षमा गैसकेको हामीले आजदेखि यो अवरोध र विरोधलाई फरक ढंगले प्रस्तुत गर्ने निर्णय गरेका छौं ।

एमालेले गत भदौ २३ देखि संसदमा अवरोध गर्दै आएको थियो । एमालेले आफुले कारबाही गरेका माधवकुमार नेपालसहितका १४ सांसदलाई बर्खास्ती गर्नुपर्ने माग राखेको थियो । सभामुखले १४ सांसदको विषयमा निर्णय नगरेपछि एमालेले सभामुखकै राजीनामा माग गरिरहेको थियो ।

तर, राष्ट्रियसभामा अवराेध कायमै

प्रतिनिधि सभामा अवरोध नगर्ने निर्णय गरेको एमालेले राष्ट्रिय सभाको बैठकमा भने अवरोध कायमै गरेको छ । बजेट अधिवेशनको पहिलो दिन मंगलबार अपरान्ह बोलाइएको राष्ट्रिय सभा बैठकमा बैठक सुरु हुनासाथ एमालेका सांसदहरुले उभिएर अवरुद्ध गरेका थिए ।

एमालेका सांसद देवेन्द्र दाहालले सभामुख अग्निप्रसाद सापकोटा र सत्तारुढ गठबन्धन दलका नेता प्रधानमन्त्री शेरबहादुर देउवाले आफूहरुले अगाडि सारेका माग सम्बोधन गर्न नचाहेकाले राष्ट्रिय सभा बैठकलाई अवरुद्ध पार्न बाध्य भएको बताए । तर, उनले आगामी दिनमा भने के गर्ने स्पष्ट पारेनन् ।