Sansar News
काठमाडौं । बैशाख ३० गते सम्पन्न स्थानीय तह निर्वाचनको मत परिणाम आउने क्रम जारी रहेको छ ।
देशैभरीका ११ उपमहानगरमध्ये हालसम्म ६ उपमहानगरसहित ६ सय ९५ स्थानीयतहको मत परिणाम सार्वजनिक भइसकेको छ ।
देशैभरी रहेका ११ उपमहानगरमध्ये ६ वटाको मत परिणाम सार्वजनिक भएकोमा नेपाली कांग्रेसले २, नेकपा एमालेले २ र नेकपा (माओवादी केन्द्र) र नेकपा (एकिकृत समाजवादी) ले १/१ स्थानमा जित हासिल गरेका छन् ।
हालसम्म प्राप्त मतपरिणाम अनुसार बाराको जितपुर सिमरा उपमहानगरपालिकामा माओवादी केन्द्रका राजन पौडेल र उपप्रमुखमा नेकपा एमालेका भोला प्रसाद अधिकारी निर्वाचित भएका छन् ।
त्यसैगरी कलैया उपमहानगरपालिकाको प्रमुख र उपप्रमुखमा नेकपा एमालेका विनोदप्रसाद साह र रौशन परविन, घोराही नगरपालिकाको प्रमुखमा एमालेका नरुलाल चौधरी र उपप्रमुखमा एमालेकै हुमाकुमारी डिसी विजयी भएकी छन् ।
त्यसैगरी नेपालगंज उपमहानगरपालिकाको मेयरमा नेपाली कांग्रेसका प्रशान्त विष्ट तथा उपप्रमुखमा जनता समाजवादी पार्टीका उपप्रमुख कमरूद्दीन राई निर्वाचित भएका छन् भने बुटवल उपमहानगरपालिकाको मेयरमा कांग्रेसका खेलराज पाण्डेय र उपप्रमुखमा एमालेकी सावित्रादेवी अर्याल विजयी भएका छन् ।
त्यस्तै हेटौंडा उपमहानगरपालिकाको मेयरमा (नेकपा (एकीकृत समाजवादी) की मीना कुमारी लामा र उपप्रमुखमा कांग्रेसका राजेश बानिया निर्वाचित भएका छन् ।
वि.सं.२०७९ जेठ ८ आइतवार ०७:५१ मा प्रकाशित
