हामी सबैकाे संसारन्यूज

काठमाडौं । अमेरिकाको टेक्सास राज्यमा मंगलबार निकै हृदयविदारक घटना घटेको छ । टेक्सासस्थित युभाल्डेस्थित रोब इलिमेन्टरी स्कूलमा १८ वर्षीय युवकले गोली चलाउँदा १९ विद्यार्थीसहित २१ जनाको ज्यान गएको छ । गोली लागेर मृत्यु हुनेमा २ शिक्षक पनि छन् ।

बिबिसीले जनाएअनुसार गोली लागेर १३ विद्यार्थी, विद्यालयका केही कर्मचारी र केही सुरक्षाकमी पनि घाइते भएका छन् ।आक्रमणकारीले विद्यालयमा गोली चलाउनुअघि आफ्नी हजुरआमालाई पनि गोली हानेको बताइएको छ । उनलाई हेलिकप्टरबाट अस्पताल लगिएको छ ।

घटनापछि राष्ट्रका नाममा सम्बोधन गर्दै राष्ट्रपति जो बाइडेनले घटना निकै दुःखद भएको बताए । उनले बन्दुकको स्वतन्त्र प्रयोगमा अंकुश लगाउने संकेत गरेका छन् ।

प्रहरीले आक्रमणकारीलाई मारेको दाबी गरेको छ । उनको पहिचानबारे अहिलेसम्म केही स्पष्ट भएको छैन । आक्रमणकारी आफै पनि विद्यार्थी रहेको बताइएको छ । टेक्सासको विद्यालयमा भएको गोलीकाण्डको यो घटना सन् २०१२ को कनेक्टिकटमा भएको गोलीकाण्डसँग मिल्दोजुल्दो देखिन्छ ।

डिसेम्बर १४, २०१२ मा, कनेक्टिकटको न्यूटाउनको स्यान्डी हुक इलिमेन्टरी हाई स्कूलमा एक २० वर्षीय पुरुषले गोली चलाएका थिए । यस हमलामा २६ जनाको मृत्यु भएको थियो, जसमध्ये २० बालबालिका थिए। यो अमेरिकी इतिहासमा सबैभन्दा घातक सामूहिक गोलीबारी थियो।

२०२१ मा ३४ विद्यालयमा गोली आक्रमण

तथ्याङ्कअनुसार सन् २०२१ मा अमेरिकामा विद्यालयमा गोली हानाहानका ३४ घटना भएका छन् । सन् २०२० मा १० विद्यालय र २०१८ र २०१९ मा २४/२४ घटना भएका थिए। त्यस्तै, २०२२ मा हालसम्म २७ विद्यालयमा गोली हानाहानको घटना भएको छ ।

अमेरिका हतियार किन्न धेरै सजिलो छ

अमेरिकामा हुने यस्ता घटनाको मुख्य कारण यहाँको बन्दुक ऐन हो । अमेरिकामा बन्दुक संस्कृतिको सम्बन्ध त्यहाँको संविधानसँग जोडिएको छ । अमेरिकामा बन्दुक राख्ने कानुनी आधार संविधानको दोस्रो संशोधनमा राखिएको छ।

बन्दुक नियन्त्रण ऐन १९६८ अनुसार राइफल वा कुनै सानो हतियार किन्नको लागि ह्यान्डगन जस्ता अन्य हतियारहरू किन्नको लागि न्यूनतम उमेर कम्तिमा १८ वर्ष हुनुपर्छ। रिपोर्टका अनुसार ३३ करोड जनसंख्या भएको अमेरिकामा आम नागरिकसँग ३९ करोड हतियार छन् ।