हामी सबैकाे संसारन्यूज

काठमाडौं । पूर्वप्रधानमन्त्री एवम् प्रमुख प्रतिपक्षी दल नेकपा (एमाले)का अध्यक्ष केपी शर्मा ओलीले अमेरिकी सहायक विदेशमन्त्री उज्रा जीयाको नेपाल भ्रमणप्रति आपत्ति जनाएका छन् । बिहीबार प्रतिनिधिसभाको बैठकमा बोल्दै अध्यक्ष ओलीले विदेशमन्त्री जीयाको भ्रमणबारे सरकारको जवाफ मागे ।

विदेशमन्त्री जीयाको भ्रमणले सरकार कुटनीतिक रुपमा कति लाचार छ भन्ने देखाएको अध्यक्ष ओलीको टिप्पणी छ । सरकारलाई छिमेक सम्बन्धप्रति किन इमानदार नभएको भनि अध्यक्ष ओलीले प्रश्न पनि तेर्साएका छन् ।

“यो सरकार कूटनीतिक रूपमा लाचार छ । एउटा उपसहायकमन्त्री आउँदा कामज्वरो आउनुपर्ने कस्तो निरिहता हो ?”, ओलीको प्रश्न छ, “स्कर्टिङ गरेर गुम्बा-गुम्बा पुर्‍याइएको छ, छिमेक सम्बन्धप्रति इमानदार हुनुपर्दैन ?”

अध्यक्ष ओलीले अमेरिकी उपविदेशमन्त्रीको भ्रमणलाई जोडेर सरकारको एक चीन नीतिबारे पनि प्रधानमन्त्री शेरबहादुर देउवासँग जवाफ माग गरेका छन् । संसदमा बोल्दै अध्यक्ष ओलीले भनेका छन्, “नेपाल एक चीन नीतिबारे अडिग हो÷होइन ? प्रधानमन्त्रीले संसदलाई स्पष्ट रूपमा जवाफ दिनुपर्‍यो ।”

अमेरिकी उपविदेशमन्त्रीको भ्रमणप्रति किन प्रश्न ?

अमेरिकी उपविदेशमन्त्री उज्रा जीया गत साता तीनदिने नेपाल भ्रमणका क्रममा नेपाल आइपुगेकी थिइन् । उनले काठमाडौंमा बस्दा प्रधानमन्त्री देउवासहित विभिन्न कुटनीतिक नियोगका प्रमुखहरुसँग भेटवार्ता गरेकी थिइन् ।

औपचारिक एजेण्डा बिना नेपाल आएकी उपविदेशमन्त्रीले काठमाडौंमा रहँदा बौद्ध र जावलाखेलस्थित तिब्बती शरणार्थी शिविरको भ्रमण गरेकी थिइन् । उनले घण्टौंसम्म गुम्बाका लामाहरुसँग छलफल पनि गरेकी थिइन् ।

उज्रा जीया अमेरिकी उपविदेशमन्त्री मात्रै होइनन् उनी तिब्बती मुद्दाका लागि विशेष संयोजक पनि हुन् । तिब्बती मुद्दाका लागि विशेष संयोजकसमेत रहेकी जीयाको भ्रमणप्रति चीनले गहिरो आशंकापूर्णं चासो व्यक्त गरेको छ ।

उत्तरी छिमेक चीनले तिब्बतको मुद्दामाथि चलखेल हुँदै गरेको आशंका गरिरहेको बेला ओलीले जवाफ मागेका हुन् । अहिले राजनीतिक नेतृत्वमा अमेरिकी उपविदेशमन्त्री जीयाको भ्रमणप्रति अनेकन आशंका छन् ।