हामी सबैकाे संसारन्यूज

काठमाडौं । सरकारले घरजग्गा कारोबारमा व्यवस्थित गर्ने खाका अगाडि सारेको छ । अर्थमन्त्री जनार्दन शर्माले आइतबार संसदमा आगामी आर्थिक वर्ष २०७९/८० को बजेट प्रस्तुत गर्दै घरजग्गा कारोबारमा लाइसेन्सको व्यवस्था गर्न लागेको जानकारी गराएका हुन् ।

उनका अनुसार अब घरजग्गाको कारोबार लाइसेन्स प्राप्त व्यक्तिले मात्र गर्न पाउने छ । “घर जग्गा कारोबारलाई व्यवस्थित र पारदर्शी बनाउन आधिकारिक निकायबाट अनुमति प्राप्त व्यक्ति र कम्पनीले मात्र घरजग्गा कारोबार गर्न पाउने आवश्यक प्रबन्ध गरिने छ”, मन्त्री शर्माले भने ।

आगामी आर्थिक वर्षबाट महानगरपालिका र उपमहानगरपालिकामा सो व्यवस्था कार्यन्वयन गरी क्रमशः सबै स्थानीय तहमा लागु गरिने उनले जनाए ।

हाल घरजग्गा कारोबार व्यवस्थित र नियन्त्रित नहुँदा खरिदकर्ता र बिक्रीकर्ता ठगिने मात्रै होइन खरिद–बिक्री पारदर्शीसमेत हुनसकेको छैन् । लामो समयदेखि विचाराधिन अवस्थामा रहेको कार्यक्रम सरकारले ल्याउन लागेको हो ।