Sansar News
भक्तपुर । यसवर्षको कक्षा १२ को परीक्षाको आजदेखि सुरु भएको छ ।
आज बिहान ८ बजेदेखि सुरु भएको परीक्षा यही जेठ २५ गतेसम्म सञ्चालन हुनेछ ।
राष्ट्रिय परीक्षा बोर्डका अध्यक्ष डा शर्माका अनुसार परीक्षामा करिब चार लाख १५ परीक्षार्थी सहभागी भएका छन् । देशभरका एक हजार २९२ केन्द्रमा परीक्षा सञ्चालन हुने बताए ।
शर्माका अनुसार ७७ जिल्लाकै सबै केन्द्रमा परीक्षा सुरु हुनुभन्दा आधा घण्टा अगाडि अनलाइनबाट प्रश्नपत्र पठाइएको हो । परीक्षा केन्द्रले प्रश्नपत्र फोटोकपी गरेर परीक्षार्थीलाई वितरण गरेको बताइएको छ ।
विगत दुई वर्ष कोभिड महामारीका कारण विद्यार्थीले अध्ययन गरेकै विद्यालय (होम सेन्टर)मा परीक्षा सञ्चालन गर्दा अनलाइनबाटै प्रश्नपत्र पठाउने व्यवस्था गरेपछि यसवर्ष पनि प्रश्नपत्र अनलाइनबाट पठाउने व्यवस्था गरिएको बताइएको छ ।
यसैबीच कक्षा ११ को परीक्षा पनि सोमबारदेखि नै सञ्चालन भएको छ । कक्षा ११ को परीक्षा विद्यालयले नै सञ्चालन गर्न पाउने व्यवस्था गरिएकोले अधिकांश विद्यालयले आजदेखि परीक्षा सञ्चालन गरेका हुन् ।
वि.सं.२०७९ जेठ १६ सोमवार ०८:२२ मा प्रकाशित
