हामी सबैकाे संसारन्यूज

काठमाडौं । पाँच दलीय सत्ता गठबन्धनले कार्यसम्पादन मूल्यांकनमा अयोग्य ठहरीएका मन्त्रीहरुलाई हटाउने तयारी गरेको छ । जसको लागि दलहरुले आन्तरिक रुपमा छलफल तथा समीक्षा गर्न थालेका छन् ।

स्थानीय निकायको निर्वाचन अघि नै मन्त्री फेरफेरको विषयमा छलफल गरेको नेकपा (एस)ले निर्वाचन लगत्तै छलफललाई सघन रुपमा अघि बढाएको छ । जारी सचिवालय बैठकबाट मन्त्री हेरफेरको निर्णय गर्ने तयारी एसले गरेको छ ।

एसका उपमहासचिव गंगालाल तुलाधरले शीर्ष तहबाट फेरफेरको निर्णय गर्ने तयारी भएको बताए । उनका अनुसार यसअघि नै ६ महिनालाई भनेर मन्त्रीहरु पठाइएको थियो ।

“अहिले पठाएका मन्त्रीहरूलाई पनि हामीले ६ महिना भनेर पठाएका थियौं, ६ महिनाभन्दा बढी भइसक्यो, उहाँहरूको कामको समीक्षा हुन्छ”, तुलाधरले भनेका छन्, “शीर्ष नेताहरु बसेर के–कति हेरफेर गर्ने निर्णय लिनुहुन्छ । यो आवश्यक पनि छ ।”

अहिले संघीय सरकारमा एक राज्यमन्त्रीसहित एसको तर्फबाट ५ जना मन्त्री छन् । जसमध्ये अधिकांश मन्त्रीको कार्यक्षमतामाथि प्रश्न उठिरहेको देखिन्छ ।

यता, माओवादी केन्द्रले पनि मन्त्री हेरफेरको विषयमा छलफल गरिरहेको छ । एक नेताका अनुसार कार्यसम्पादनमा उत्कृष्ट नदेखिएका मन्त्रीहरुलाई फिर्ता बोलाउने तयारी भएको छ । माओवादीले समग्र मन्त्रिपरिषदकै पुनर्संरचना चाहिरहेको उनले बताए ।