हामी सबैकाे संसारन्यूज

मुगु संसार न्यूज । खत्याड गाउँपालिका–१० हयाङलु गाउँका नानी शाही कर्णाली नदीमा झोलुङे पुल बनेपछि खुशी हुदै वारिपारि तर्न थालेकी छन् ।

पहिले तुइनबाट वारपार गर्दै आएकी उनी नदीमा झोलुङे पुल बनेपछि घाँस दाउरा अनि गाई चराउन वारिपारि आउजाउ गर्न सजिलो भएको छ । ‘पुल बनेपछि तुइनबाट मुक्ती पाइयो’ नानीले भनिन्, ‘उहीलेका ती दुःखको दिन सम्झिदा मन ढुकढुक हुन्छ । असार साउनको उर्लिदो कर्णालीमा तुइनबाट वारिपारि गर्नु पर्दा साह्रै डर लाग्थ्यो ।’

झोलुङ्गे पुल क्षेत्रगत कार्यक्रमबाट मुगुको बिना गाउँदेखि बाजुरा जोडने पुल निर्माण गरेपछि यहाँका स्थानीय तुइनबाट मुक्त भएका हुन् ।

सोरु गाउँपालिका–४ का गंग शाही पनि झोलुङे पुलबाटै वारिपारि गर्न पाउदा खुशी छन् । पहिले तुइनबाटै हुम्ला तुम्च गाउँ आउजाउ गर्दै आएका उनी अचेल पुलबाट हुम्ला बालुकुना समान किन्न इष्टमित्र भेटघाट गर्न जाने गर्थे । झोलुङ्गे पुल बनेपछि हुम्ला तुम्च जिउलाको जग्गा कमाउन सजिलो भएको तथा गाई गोरु वारिपारि लान ल्याउन निकै सुबिधा भएको शाही बताउँछन् ।

हुम्ला कर्णाली नदीको बालुकुनामा झोलुंङ्गे पुल बनेपछि मुगुका लिब्रु, रावलबाडा, भादगाउँ र वारि हुम्ला तुम्च गाउँका स्थानीयलाई वारिपारि गर्न सहज भएको छ ।

छायाँनाथ रारा नगरपालिका–१४ सुम्ली गाउँको मुगु कर्णाली नदीमा झोलुङ्गे पुल बनेपछि सुम्ली गाउँका र कच्ची, आसीधारा गाउँका स्थानीयको बैबाहिक सम्बन्ध जोडिएको छ । पहिले ज्यान जोखिम राखेर मुगु कर्णाली नदी वारपार गर्दै आएका सुम्ली गाउँका स्थानीय अचेल पुलबाटै वारिपारि गर्न पाउदा खुशी भएका छन ।

नदी वारिपारिका बालबालिकालाई पनि बिद्यालय जान सहज भएको छ । पुल नहुँदा जोखिम मोलेर सुम्ली गाउँका बिधार्थी कच्चे गाउँमा पढन जाने गर्थे भने अचेल पुलले गर्दा बिधार्थीहरुलाई पनि वारपारि गर्न सुबिधा भएको छ । तुइनबाट मुक्ति पाउदा खुशी लागेको सुम्ली गाउँका बिर्ख भण्डारी बताउछन् ।

जोडियो सम्बन्ध
कर्णाली नदीमा झोलुङ्गे पुल निर्माणले गर्दा वारिपारि गाउँबीच बैबाहिक सम्बन्ध समेत बिस्तार भएको छ ।
तुइनले गर्दा वारिपारि गाउँको बैबाहिक सम्बन्ध टाढा भएको अबस्थामा पुलले गर्दा वारि गाउँकी चेली पारि गाउँमा बिबाह र पारि गाउँकी चेली वारि गाउँमा बिहे गर्न थालेका छन् ।

युवायुवतीहरु पनि झोलुङ्गे पुलमा भेटघाट गरि मायाप्रेम गाँस्न थालेका छन् । वारि गाउँको उत्पादन वारि गाउँमा लिएर बिक्री समेत गर्न थालेका छन् ।

झोलुङ्गे पुल बनेपछि केरा अमिलो बदाम पारि कर्णाली रोडमा लिएर बिक्रि गर्न सजिलो भएको सोरु गाउँपालिका–४ बल बुढाले बताए । अर्कोतिर नदी वारिका स्थानीय नदी पारि पुगेर माछा मार्न समेत थालेका छन् ।

पुलले गर्दा बिबाह, ब्रतबन्ध, पूर्णीमा मेला, देउसी भैलो खेल्न नदी वारिका स्थानीय पारि जाने र पारिका वारि आउन थालेपछि बैबाहिक सम्बन्ध बिस्तार भएको स्थानीयको भनाई छ ।

कर्णालीमा ३ सय ३९ पुल
साविकको कर्णालीका ५ वटा जिल्लाम अहिलेसम्म ३ सय ३९ झोलुङ्गे पुल निर्माण भएको झोलुंङ्गे पुल क्षेत्रगत कार्यक्रम कर्णाली प्रदेश सुर्खेतले जनाएको छ ।

कर्णालीको ५ वटा जिल्लामा १ सय २३ वटा झोलुङ्गे पुल निमार्णाधिन अबस्था रहेको कार्यक्रमले जनाएको छ । कर्णालीको सबैभन्दा बढी डोल्पामा ७७ वटा, कालिकोटमा ७५ वटा, मुगुमा ६७ वटा, हुम्लामा ५६ वटा र जुम्लामा ६४ वटा झोलुङ्गे पुल निर्माण गरिएको छ ।

झोलुङ्गे पुलको लागत
बिशेष गरेर कर्णाली नदीमा झोलुङ्गे पुल निर्माण गर्न डोल्पा र हुम्ला बाहेक मुगु, कालिकोट र जुम्लामा सहज छ ।

सडक मार्ग पुगेपछि तराई बाट सिमेन्ट फलामे ला रड र पाटपुर्जी ढुवानी गर्न कम लागत लाग्ने गरेको छ । ढुवानी सहज भएको जिल्ला एक झोलुङ्गे पुल निर्माण गर्न ४० देखि ४५ लाख र असहज जिल्लामा ६० लाख भन्दा बढी बजेट खर्च हुने झोलुङ्गे पुल क्षेत्रगत कार्यक्रमले जनाएको छ ।