हामी सबैकाे संसारन्यूज

काठमाडौं । चीनले अन्तरिक्षमा आफ्नै अन्तरिक्ष स्टेशन स्थापना गर्ने भएको छ । जसको लागि चीनले अन्तरिक्ष यात्रीलाई मिसनमा पठाएको छ । यो मिसन करिब छ महिनासम्म चल्ने बताइएको छ । तीन जना यात्रुले चिनियाँ अन्तरिक्ष स्टेशन तियाङगोङको निर्माण कार्य पूरा गर्नेछन्।

जानकारीका अनुसार अन्तरिक्ष यात्री चेन डोङ, लिउ याङ र काई जुझेलाई शेन्झाउ–१४ अन्तरिक्ष यानमार्फत अन्तरिक्षमा पठाइएको छ । यो टोलीले पृथ्वीको परिक्रमा गर्ने चीनको अन्तरिक्ष स्टेशनको निर्माण कार्य पूरा गर्नेछ। शेन्झाउ–१४ अन्तरिक्ष यान उत्तरपश्चिम चीनको जिक्वान स्याटेलाइट प्रक्षेपण केन्द्रबाट लङ मार्च-२ एफ रकेटमा अन्तरिक्षमा पठाइएको थियो।

राष्ट्रिय अन्तरिक्ष प्रयोगशाला स्थापना गरिनेछ

चिनियाँ अन्तरिक्ष एजेन्सी सीएमएएएका उपनिर्देशक लिन शिकियाङले मिसनमार्फत अन्तरिक्ष स्टेशनलाई राष्ट्रिय अन्तरिक्ष प्रयोगशाला बनाइने बताए। टोलीले दुई ल्याब मोड्युलहरूको डकिङ र ट्रान्सपोजिसन पूरा गर्न कोर मोड्युलसँग काम गर्नेछ। तिनीहरू पहिलो पटक दुई प्रयोगशाला मोड्युलहरूमा प्रवेश गर्नेछन् र वातावरणलाई बस्नको लागि उपयुक्त बनाउन मद्दत गर्नेछन्। उनले दुई मोड्युलमा एक दर्जनभन्दा बढी वैज्ञानिक प्रयोग क्याबिनेट खोल्ने र जडान गर्ने बताए ।

तीन सदस्यीय टोली वैशाखमा फर्किएको थियो

यसअघि, तीन सदस्यीय चिनियाँ अन्तरिक्ष यात्री टोली अन्तरिक्ष स्टेशनको महत्वपूर्ण भागहरू निर्माण गरी रेकर्ड छ महिना बिताएपछि अप्रिलमा पृथ्वीमा फर्केका थिए। यो टोलीमा एक महिला अन्तरिक्ष यात्री पनि थिए । यो वर्षसम्म स्टेशन तयार हुने अपेक्षा गरिएको थियो । सीएमएसएका अनुसार, तिनीहरूले यसको स्पेस स्टेशनको लागि प्रमुख प्रविधिहरूको प्रमाणीकरण पूरा गरेका थिए।